Seggae is ne muziekstiel den't is ontstoan oet reggae en sega, ne tradisjonele muziekstiel van t Afrikaanse eilaand Mauritius. t Is doar ook de populairste muziekstiel.

Seggae is ontstoan in middeln van de joaren '80 van t 20ste joarhoonderd duur Joseph Reginald Topize, nen Mauritaansen rastaman, den 't zik Kaya neumden, noar n bekeand nommer van Bob Marley. Topize zung vuur de rechten van de kreoolse bevolking van Mauritius. Topize wör vermoord in de gevangenis, woer't he in zat vuur t verböaden bezit van marihuana.

Umdet Mauritius lange ne Fraanske kolonie was, was de offisjele sproake lange Fraansk. Oet Fraansk en de oorsproonkelike sproaken van Mauritius ontsteun ne Fraanske kreoolsproake, den't nog aait de heuwdsproake in seggae is. Nöast Mauritius is seggae slim populair op t eaileandke Réunion.

Kenmoarken bewark

Seggae wörd emaakt met instrumeanten dee't ook vuur reggae gebroekt wordt, dus drums, basgitaar, gitaar, piano en örgel. t Belangriekste verskil met gewonen reggae is det seggae in 12/8 of 6/8 moatsoort espöld wörd. Det heuld in det iederen tel besteet oet dree achtsten, in plaatse van twee (zo as det in reggae gebroekelik is).

Reggae wörd eteeld as één-en-twee-en-dree-en-veer-en (woerbie t bekeande reggae-noapikken op iederen "en" keump, en t akseant met kleaine tromme en grote tromme ligt op n tweeden en n veerden tel). Seggae wörd zo eteeld: één-ne-me-twee-ne-me-dree-je-me-veer-em-me, ook met slag van de kleaine tromme op elken tweeden en veerden tel. Ne variasie hierop keump ook vuur: de kleaine tromme gef n slag op de twee-JE en de veer-RE. Dit kan der vuur zorgen det n meender muzikaal persoon tooverdan nen achtsten tel nöast de moate zit.

Oetgoande verbeendige bewark