Boertang
Boertang (Nederlaands: Bourtange) is n vestendörpie in t oosten van de provìnzie Grönnen in t gebied Westerwolde. t Is aanlègd tiedens de Tachtegjoarege Oorlog in opdracht van stadholder Willem I. Dou t Stad in Spoanse handen veul, wol Willem I t isoleern zodat der gain haandel meer meugelk was tuzzen Stad en de Spanjoarden in Duutslaand. Doarveur mozzen zai over Westerwolde, n streek op n zaandrugge tuzzen t Boertanger Moor. Bie Boertang was de ainege deurwege noar d Stad. Vandoar dat juust op de Boeren Tange (= zaandheuvel) de schaanze baauwd wuir. Boertang meuk duil uut van n verdedigenslinie woartou ook Kouvort, Nèjschaanze en Oalschaanze beheurden. Boertang is noeit innomen deur vijandege troepen.
In 1851 wuir de vesten opheven en stond t meer as honderd joar leeg en verwilderde. In de joaren '70 van de 20e aiw nam de gemainte Vlagtwedde t initsjatief om de schaanze weer opnèj op te baauwen. Rond 1990 was de heeropbaauw kloar en wuir t opend veur publiek. In 2001 wuiren de lèste gebaauwen der bie baauwd, woarnoa t huilmoal voltooid was.
Tegenswoordeg is Boertang boeten zien vestenswallen gruid en is der n dörp om de vesten ontstoan. Binnen de vestenswallen wonen nog om en bie 50 mìnzen.
Hìnwiezen
bewark
|
Commons: Boertang - plaatjes, filmkes en/of gelüüdsbestanden. |
|
Schreven in t Veenkelonioals |