Family Guy is ne Amerikaanse tekenfilmriege aover ne familie in de fiktive stad Quahog. De riege wörd sinds 1999 deur Seth MacFarlane emaakt veur FOX. In 2002 wier de produksie stop-ezet, maor deur positive reaksies op de dvd en de herhalingen wörd der sinds 2005 weer nieje afleveringen produseerd.

De riege wörd in Nederland sinds 17 september 2007 uutezonden deur Comedy Central. Eerder wier de riege al uutezonden deur NET 5. In Amerika wörd de riege uutezonden deur FOX.

Der is juust bekend emaakt dat der in 2012/2013 n 11e seizoon van Family Guy produseerd wörd.

Personages bewark

Familie Griffin bewark

  • Peter Griffin (in-espreuken deur Seth MacFarlane) is t heufd van disse familie uut Quahog, Rhode Island. Peter kump neet altied wies aover en volgens Petarded (seizoon 4, aflevering 6) is e zelfs achterlik. Hiej warkt biej brouwerieje Pawtucket Patroit.
  • Lois Pewterschmidt (in-espreuken deur Alex Borstein) is de vrouwe van Peter. Ziej döt t huusholden en warkt thuus as pianojuf. Ziej hold völ van eur gezin en probeert met n gezond verstand de normen van fatsoon binnen t huus in stand te holden. In latere afleveringen is ziej minder braaf; soms lik t of ziej drugs ebruukt en op seksueel gebeed is ze neet viest van vrömde experimenten.
  • Megan 'Meg' Griffin (in-espreuken deur Mila Kunis) is nen efrusteerde puber en hef völ problemen met eurzelf, ok umdat ziej neet völ vrienden hef op de schole. Der wörd ezegd dat dit kump umdat ziej arg lellik is en mangs seksueel gedrag vertoont. Echt hil lellik is ziej ok neet, maor arg knap is ziej ok neet. Wanneer ziej vriendinnen krig bunt dit vake nogal aparten. Ok hef ziej n paar vriendjes ehad, waorvan der maor ene n betjen normaal te neumen was. Maor dissen wier al snel in-epikt deur Lois. Meg wörd wal bewonderd deur nen nerd op de schole.
  • Christopher 'Chris' Cross Griffin (in-espreuken deur Seth Green) is nen vette tener den völle lik op zienen va Peter. Hiej is eigelik Peter's jongere versie: vet en neet zo wies. Hiej kan good tekenen en schilderen maor wieter kan e neet zo völle.
  • Stewart Gilligan 'Stewie' Griffin (in-espreuken deur Seth MacFarlane) is nen wiezen kleinen met n Brits aksent dee den weerld wil veraoveren. Mangs lik t of de rest van t gezin m neet versteet, maor mangs verstaot ziej m wal. Brian kan wal altied met m praoten. Stewie hef altied futuristiese wapens en probeert altied zien mo te doden. Hiej nuump ziene mo Lois en zienen va Fat Man. In de latere seizonen lik Stewie arg homoseksueel.
  • Brian Griffin (in-esproken deur Seth MacFarlane) is den antromorfe hond van de familie. Hiej is, undanks ziene aoverwonnen kokaïneverslaving, ziene foezelverslaving en rookverslaving, t normaalste en t meist volwassen gezinslid. Waorum Brian kan praoten is nog neet bekend. Brian is arg intellektueel, wies en höld van opera en literatuur. Hiej is verliefd op Lois. Hiej hef ne vrömde relaatsie met Stewie: ziej bunt steeds meer vrienden eworden, maor hebt mekare ok steurig in de heure.

Famillieleden bewark

  • Carter Pewterschmidt (in-espreuken deur Seth MacFarlane) is den va van Lois. Hiej hef zien eigen bedrief "Pewterschmidt Industry" en is ok lid van nen jachtklub. Hiej kan Peter neet lieden, mek vake moppen aover m en löt m vernederende of pienlike dingen doon.
  • Barbara Pewterschmidt (in-espreuken deur Alex Borstein) is de mo van Lois en de vrouw van Carter
  • Francis Griffin (in-espreuken deur Charles Durning) is den stiefva van Peter. Hiej is nen arg to-ewieden Reums-Katteliek, hiej hef de skurft an Lois umdat ziej protestants is. Francis had wark in nen metaalfabriek, maor nao zien kotte pensioen wier hiej liefwacht van den Paus. Op Megs 17e verjaordag probeert Peter zat en verkleed as kloun met nen eenwieler van de trappe af te riejen. Hiej völt recht op Francis dee later in t krankenhuus oet de tied kump. Ziene leste woorden waren: "Peter... you're a fat stinking drunk"
  • Thelma Griffin (in-espreuken deur Phyllis Diller) is den kettenrokende ex-vrouwe van Francis en mo van Peter. Anders as Francis is ziej vrendelik en kan ziej good met Lois aoverweg. In de aflevering "Mother Tucker" vönk ziej ne relaatsie an met Tom Tucker, maor ziej gaot in dezelfde aflevering weer uut mekare.
  • Mickey McFinnigan (in-espreuken deur Seth MacFarlane) is den biologiesen va van Peter. In de aflevering "Peter's two dads" ontdekt Peter dat Francis neet zienen echte va is. Hiej geet daornao op zuuk naor zienen echten va. Zien mo vertelt m dat ziej 40 jaor terugge op vekaansie was egaon naor Ierland en daor Mickey had leren kennen.

Naobers bewark

Familie Brown bewark

  • Cleveland Brown (in-espreuken deur Mike Henry) is den slome naober van de familie. Cleveland is nen Afro-Amerikaan den naor manifestaties as de 'Million Man March' geet. Dit bewis dat hiej trots is op ziene zwarte roots. Via nen flashback komt wiej te wetten dat Cleveland vrogger veilingmeister was, töt een bedriefsongeluk derveur zorgen dat hiej neet onmundig good meer kon sprekken. Zien huus worden verskeidene maolen deur Peters onvernul verwoost. Cleveland zol den show offisieel verlaoten, hiej kriegt zienen eigen show: The Cleveland Show.
  • Loretta Brown (in-esproken deur Alex Borstein) is de vrouwe van Cleveland. In latere afleveringen bunt Cleveland en Loretta uut mekare egaone, ziej ging vrömd met Quagmire umdat Cleveland neet mannelik genog zol waen. In The Cleveland Show geet Lorreta dood deur 'n ongeluk.
  • Cleveland Brown Jr. (in-espreuken deur Mike Henry) is n hyperaktief keerlken en enig kind, dat good is in völ dingen, maor nargens langer as 5 minuten interesse in hef. In de eerste aflevering van The Cleveland Show zeet wiej dat e vet en sloom is eworden.
  Dit artikel is eskreaven in et achterhooksk, in de Algemene Nedersaksiese Schriefwieze.