John N. Gray (17 april 1948, South Shields, County Durham, Verienigd Keuninkriek) is 'n bekende Britse poletiek filesoof en skriever. Hi'j was heugleraar Europees Deanken op de London School of Economics.

Skriever bewark

Gray skref vake in The Guardian ('n kraante), New Statesman, en The Times Literary Supplement en hef 'n portie infloedrieke boeken eskreven over poletieke theorie, iene daorvan is Straw Dogs: Thoughts on Humans and Other Animals (2003), hier döt he 'n anval op 't humanisme, wat he zöt as 'n weerldbekieks dat op rilligieuze ideologien is fundeerd. A-j 't Gray vraogt is de wille, en daormet de moraal, 'n illusie en hi'j zöt de meansheid as 'n roofzuchtig soort die aandere levensvörms uutreuit en zien netuurlike umgewing ofbrek. Körte tied terugge har he nog kommentaar op 't utopise deanken van 'n feuruutgaangsgeleuve (sund de Verlichting) en op 'n kristendom, umdat dissent kwamen met de verlössingsgedachte.

Gray was 'n anhanger van New Right in 'n jaoren tagtig en daornao van New Labour in 'n jaoren neengntig. Teengnsworig zöt Gray 't konventioneelen links/rechts-spektrum van konservatisme en sosjaaldemokrati as nutloos.

Sund de jaoren neengntig is Gray feural bekend deur zien studie naor 't muuilike tussen 't pluralisme en liberalisme van Isaiah Berlin. En deur zien sgarpe kretiek op 't neo-liberalisme en de mondiale vri'je markt. 'n zettie eledene har he nog kommentaar op 'n portie belangrieke stroomings in 't Westerse deanken, zo as 't humanisme en 't utopisme, en giet he nöör, wat 't lek, 't ekologisme. Um wat an te halen: hi'j hef zien deanken onder aander 'n bettie van de Gaia-hypothese van James Lovelock over-enömmen. Maa hi'j zöt de toekomst duuster in, umdat he der van uutgiet dat de meanse nie zomaa zol veraanderen. En hi'j deankt dat de ienentwintigste eewe zol wörn belaogd deur oorloongn, met deurdat de netuurlike bronnen zo zaggies an op zult gaon.

Stukkies bewark

Hier 'n antal stukkies uut zien boeken:

Geestlik lefen is niet ’n zuken naor betekenisse maa ’n bevri’jding dervan. (...) Aandere dieren hebt gien doel in ’t leven neudig. Maa ’t meanslike dier, ’n teengnsprake met zichzölf, kan nie zunder. Wörumme zollen wi’j der nie van uutgaon dat de zinne van ’t lefen ienvoaldig is te ziene? -Strohonden-

Schrieveri'je bewark

Boekn oover Gray
  • Horton, John en Glen Newey, eds. (2007) The Political Theory of John Gray. London: Routledge. ISBN 041536647X.
  Dit artikel is eskreaven in et sallandske dialekt van 't Vechtdal.