Muhammad Ali

Muhammad Ali (/ɑːˈliː/; geboaren as Cassius Marcellus Clay Jr.; 17. january 1942 – 3. juni 2016) was nen professionälen bokser uut de Vereynigde Ståten. Med synen byname "the Greatest" (den Grötsten) wördt he algemeyn seen as eyne van de vöärnaamste sportfiguren uut de 20. eywe. Tüsken 1964 un 1970 was he titelholder under de swårgewichten van et bokstydskrivt Ring. Tüsken 1974 un 1978 was he unverslån wearldkampioon un in 1974 un 1978 de WBA un Ring-kampioon. In 1999 köäs et blad Sports Illustrated em as Sportman van de Eywe un de BBC em as Sportpersöönlikheid van de Eywe.

Geboaren in Louisville in den ståt Kentucky begün he med boksen do as he 12 jår was. Med 18 wün he ne goldene medaille in de lechte swårgewichtenklasse up de Olympiske Summerspöllen van 1960. Datselvde jår makeden hee der syn beroop van. Eyrder had he sik al bekeyrd as moslim un güng by de Nation of Islam (ne organisaty dee anhangerskap van de islam verbindet med den swarten rechtsstryd in de VS), mär halverweage de söäventiger jåren dea he der afstand van. Up 25. february 1964, do as he 22 was, wün he et wearldkampioonskap vöär swårgewichten. In nen grouten wedstryd verslöög he Sonny Liston. In datselvde jår dea hee syn geboardename Cassius Clay der achterhen. Dat was ja nen 'slavenname', meynden hee. Hee löät sik inskryven as Muhammad Ali. In 1967 weigerden hee militären deenst. Dat kun ja neet med syne gelöyvsoavertügingen un ümdat he teagen den Oorlog in Vietnam was. Soudöänig wör he veroordeyld vöär deenstweigering un nöämen se em al syne titels af. Dår güng he teagen in beroop by et amerikaanske höygere gerechtshov, dee as em uutendelik in 1971 gelyk gavven. Sou sat he veer jår stille, nen flinken hap uut syne loupbane as sportman. As bewüst un uutespröäken teagenstander van den Vietnamoorlog wör hee en vöärbeald vöär de upstandige jungerenkultuur van de jåren '60. Ouk was he nen inspirator vöär de afro-amerikanen, ümdat he sou gröytsk up synen afkumst was.

Ali vöchten in meyrdere herinnerenswaerde bokswedstryden. Syne gevechten med Sonny Liston, Joe Frazier (wårunder de Fight of the Century, et grötste boksgeböären van dotyds), de Thrilla in Manila un syn gevecht med George Foreman in The Rumble in the Jungle tröäken vöäle andacht in de media. Wåras vöäle andere boksers öäre managers vöär de kamera's löäten küeren, stünd Ali selv gaerne in de belangstelling. Syn wat vrömd andoonde un uutdagende persöönlike trekken wörden flink uutvergrouted. Hee kun anderen good med wöörde afbranden, wat he vake ouk noch up rym dea. Dårmed wör he ouk noch es nen pioneer in de hiphop. Vake dea he ne vöärspelling in wükke runde as he synen teagenstander der af solde hauwen. As bokser stünd Ali bekend üm syne ungebrukelike beweagingen, vrömd vootwark un handig gebruuk van de rope-a-dope-technik (in de töwwe löänen un den ander sikselv möde låten vechten).

Buten boksen ümme kreag Ali noch sukses as spokenword-artist. Hee gavven twey studioalbums uut: I Am the Greatest! (1963) un The Adventures of Ali and His Gang vs. Mr. Tooth Decay (1976). Beide albums wörden vöäredraegen vöär nen Grammy Award. Ouk spöälden hee med in films un skreav ouk selv; hee brachteden twey leavensbeskryvingen uut. In 1981 skeidden hee uut med boksen üm sik meyr up religy, vrygeavigheid un aktivisme to richten. In 1984 küm he med et nys dat he parkinson had. Lüde meynden, dat sol wal van et boksen kummen, mär dat hebbet hee un syne dokters altyd untkend. Hee bleav wearldwyd uptreaden, wat de lätste jåren van syn leaven minder wör. Later sorgden syne family vöär em.

Persöönlik

In 1972 güng Ali med up de hajj, den pelgrimstocht nå Mekka. Later untwikkelden hee en interesse in sufisme, ne filosofiske ströyming binnen de Islam. Ali trouwden in totaal veer mål. Hee hevt söäven dochters un twey söäns.