Albert van Giffen

Nederlaandse oldheidkundige

Albert Egges van Giffen (Noordhörn, 14 meert 1884Zwolle, 31 meie 1973) was een Nederlaandse oldheidkundige. Hij hef bezunder veule bemuienis ehad mit 't in kaorte brengen en restaureren van de hunebedden. Deur de Drèentse bevolking wördden hij daorumme wal "'t spittertien" enuumd.

Perfester Albert van Giffen

Van Giffen gruide op in Dever en studeerde plaant- en dierkunde an de Rieksuniversiteit Grunning. Zien eerste archeologische preject was in 1908, toen as e opziener wördden bij de ofgraving van de wierde van Dörkwerd. In de jaoren tien was e een antal jaor conservator bij 't Rieksmuseum van Oldheden in Leiden. Daornao gunk e weerumme naor Grunning, waor e in 1920 an de universiteit 't Biologisch-Archeologisch Instituut oprichtte. Hij gaf les in de prehistorie en de Germaanse oldheidkunde. Later wördden e butengewoon hooglerer an de Universiteit van Amsterdam.

Rond de jaoren dartig deu-r-e archeologische opgravings naor Romeinse en vrogmiddelieuwse resten onder 't Domplein in Utrecht. In de jaoren veertig was e gaanks in Zuud-Hollaand mit opgravings naor de Romeinse nederzetting Praetorium Agrippinae en in Utrecht naor 't Romeinse fort Fectio.

Veule van zien schrieverije deu Van Giffen in zien zomerhuus, De Heezeberg, in 't Grunningse wierdedörp Aisen. Mit zien opgravings in Aisen in de jaoren twintig en dartig legde hij as eerste de structuur van een dörp deur de ieuwen henne kats bloot. Daorbij ontwikkelde hij zien kwadrantenmethode of taartpuntemethode, waorbij de onderzöchte stee in zowal verticale as horizontale glieven ofegraven wördt. Op dizze meniere kriej zo veule meugelk gegevens intied dej zo weinig meugelk verrineweert. Töt die tied wördden een viendstee kats ofegraven, laogien veur laogien, mar deur de neie methode bleef een diel van de stee onversteurd.

Van Giffen hef alle nog bestaone hunebedden in Nederlaand in kaorte ebracht en bij verscheiden hunebedden baodemonderzuuk edaone. Alle hunebedden gaf e een letter mit een nummer, beveurbield D1 veur 't noordelijkste Drèentse hunebed. In 1925-1927 publiceerde hij aover zien hunebeddenwark een dreidielig boek, det nog aid as standaardwark wördt eziene.

Van Giffen was etrouwd mit Klaziena Geertruida Homan, mit wie e vier kiender had. Nao heur scheiding trouwde hij mit Guda Erica Gerharda Duijvis.

Dit artikel is eschreven in 't Zuudwest-Drèents.