De Desperaten (wanhopigen) warren een köppelke boeren oet de Zutfense Groafskop, dee in den Tachtigjoarigen Oorlog een leager vörmden en doarmet in et gewear kömmen.

Groafskop Zutfent roond 1350

Verhaal bewark

De boeren harren aait te lieden van de stried tusken Stoatse leagers en de verskillende leagers in Spaansen deenst. De beaide partiejen kömmen bie de boeren regelmoatig ne "biedreage" (braandskatting) innen, umdet de leagers vake slecht betaald kregen van de leaders. Doarbie breuken ze vake allen duwel of en steuken mangs zelfs de boerderieje in den braand. Boeren dee neet betalen wollen, konden rekkenen op marteling en mangs zelfs de dood.

Van stadhoolder Rennenberg van de Noordelike Proveensies mochten de boeren van Dreante zik doartegen verzetten. Aal mear boeren sleuten zik an en et verzet sleug oawer noar Oaweriessel, woer as in 1580 de Oaweriesselse Boerenopstaand begunnen was. Hellige boeren drewen de soldoaten met zeaisen en gaffels vuur zik oet, richting Zutfen. Ook doar gungen de boeren met in opstaand.

Den Geeldersen Stadhoolder Willem van den Bergh was bie den boerenopstaand in de Groafskop bie ewest en har de boeren ehulpen: ”Dese Boeren noemden haer selven de Desperaten, hadden in haer Vendelen een Sweert met een halven dop van een Eye daer den doyer neven uyt-gheloopen was, seggende sy en hadden tot noch toe om ’t Ey niet willen vechten, nu mosten sy om den dop vechten”. Ze warren tegen de Stoatsen ekeerd, zoonder pro-Spaans te wean.

De boerenopstaand leek eerst te lukken. Filips van Hohenlohe-Neuenstein wör verdrewen noar Emmelkaamp. Hee was gewoond, en mos zelfs zin peard en tuug achterloaten. Mer bie den anval op Breevoort gung et mis. De Desperaten mossen vluchten. Van Hohenlohe slachten bie klooster Sion bie Deutekom zowat veerhoonderd boeren of.