Drammen

Drammen is ne stad en gemeente in de Noorse strekke Buskerud. Et ligt um den moond van den Drammensfjord. Et ligt vastegröaid tegen Lier in et noordoosten, Zwelwiek in et zuudoosten, Sande og Hof in et zuden en Nedre Eiker in et westen. Et ligt ongevear 40 km op et zuudwesten van Oslo.

Woapen van Drammen

Bie Drammen zeent rotstekeningen veunden van mear as 6000 joar oold. Det zol der op duden det der al zo lange volk roond Drammen ewoond hef. De eerste zekere tekens van inwonning komt oet de Vikingtied. Toen was de stea bekeand as "Dramn" of "Drofn". In dee tied steund et water veer of vief meter heuger. Den fjord strekten zik oet töt an Hokksund. In dee tied voorden de boten van de noormänne in et Drofnfjord. Den Ieslaandsen verledensbeskriewer Snorri Sturluson skreef in 1070 at keunink Olaf den Healigen zik in et Drammfjord versteuk vuur Knoet den Machtigen. In dissen tied kreeg Drammen ook zienen eersten healigen, Sunte Hallvard, den as in den fjord verdreunk in 1043. Later wör hee beskoarmhealigen van Oslo.

Drammen is ene van de rapst gröaiende wonplaatsen van Noorweagen. De bebouwing löp duur töt in Lier, Røyken, Nedre Eiker en Øvre Eiker. Met alle vuursteaden der bie wont der 112.123 leu in Drammen. De gemeente drammen hef 64.597 inwonners. Et is de viefdegrötste stad van Noorweagen.

Drammen is de tweedegrötste intrekkersstad van Noorweagen, noa Oslo. Mear as 21% van de bewonners keump neet oet Noorweagen.