Drum en bass (ouk skreaven as Drum&Bass of drum'n'bass en vake ofkorted töt D&B, DnB of D'n'B) is nen styl van elektroniske musik. Karaktertrekken sint under meyr gauwe en verknipte upnames van drums (breakbeats), meysttyds sou tüsken de 165 en 185 slagen de minute, swåre bas- en subbaslynen, geluudssnippers en synthesizers. De styl kümt uut de junglescene van et Vereynigd Köäningryk van de jåren 1990.

De Roland TR-808 Rhythm Composer, uut 1980–1984, wöär slim belangryk in drum en bass.

De leevhebberye van Drum en Bass löpt lykup med andere dansmusik. Grouten invlood up Drum en Bass sint de oarsprungelike jamaikaanske reggae en dubreggae, wåras den slimmen nådruk up swåren bas van wegkümt. En ander kenmark is de synkopaty, et verskuven van et ritmiske gevööl döär upnames van drumsamples neet heylemål af te spöälen mär halverweage of up dreekwart af te knippen en vannys in te starten. Disse verskuving kan in bepålde understylen ouk bereiked wörden med versköävene stoaten van de baslyne.

Der sint heyl wat undersoorten van Drum en Bass: breakcore, ragga jungle, hardstep, darkstep, techstep, neurofunk, ambient drum and bass, liquid funk (ouk bekend as liquid drum and bass), jump up, drumfunk, sambass en drill 'n' bass. Up syne böärte hevt Drum en Bass weader andere stylen beïnvloded, sou as hiphop, big beat, dubstep, house, triphop, ambient music, techno, jazz, rock en pop.

Wat der officieel uutkümt an drum en bass is in handen van en når verholding kleine grup platenlabels. Groute, internationale musiklabels hadden lange tyd weinig interesse. Töt BMH Rights Management in 2016 RAM anskaffeden. Seyd dee tyd krigt den musikstyl voordan meyr andacht. De 'huusbasis' van Drum en Bass is et Vereynigd Köäningryk. Andere groute centra vöär den styl sint Australie, Kanada, Nyseyland, de Vereynigde Ståten en Süüdafrika. Den styl hevt nömenswaerdige volgergrupen in landen as Oustenryk, Rusland, Estland, Tsjechie, Belgie en Neaderland.