Funk is ne muziekstiel den't oet de Verenigde Stoaten keump. t Is ne slim ritmiese muziekstiel, den as t mut hebben van t samengoan van korte, stoterige, stakkato espölde lienen van de drums, basgitaar, bloazers, slaggitaren en örgel. Bie funk wörd vuural n eersten tel van de moate slim benoadrukt. Wieters zeent synkopen machtig belangriek.

James Brown

Geskiedenisse bewark

n Naam "funk" betekenen oorsproonkelik "stoarke lichaamsrökke" of de locht wat vriekeump bie t vriejen. Doarumme was t lange n ontfatsoenlik woard. Later köm t te stoan vuur laankzame, ritmiese en stakkato-muziek. Eerst was funk nog n soort R&B, mer vanof de zestiger joaren van t 20ste joarhoonderd begun t zik heanig an in ne aparte weg te oontwikkelen.

60er joaren bewark

In de zestiger joaren begun funk as ofzeunderlike muziekstiel, met bekeande artiestn zo as James Brown en de leu um um hen en later ook The Meters. Aandere bekeande ärtieste oet dee tied warren oonder mear Bootsy Collins, Charles Wright & the Watts 103rd Street Rhythm Band, George Clinton, Maceo Parker, Sly & The Family Stone, The Commodores, The Isley Brothers, Alan Evans, The Ohio Players en War.

70er joaren bewark

In de zeuwentiger joaren kree'j ne nieje streuming binnen de funk, dee't duur George Clinton en zin Parlemeant/Funkadelic-koppel p-funk eneumd wör. Oet funk ontsteund ook disco, det an t eande van de zeuwentiger joaren opköm. Oet disse tied warren de ärtieste Earth, Wind & Fire en Rick James machtig bekeand. Ook kree'j in de zeuwentiger joaren de jazzfunk met oonder mear Herbie Hancock met zin album Headhunters oet 1973.

80er joaren bewark

In de tachentiger joaren kree'j aal mear mengvörme tusken funk en aandere stielen. Zo onsteund in de Amerikaanse stad Minneapolis ne aparte funksoort, vuural duur de noavolging van Prince. Der wör völle vermengd met popmuziek, new wave en rock. Ook de Red Hot Chili Peppers, dee't in 1989 duurbreuken, hadden in t begin völle funkinvloden. Vanof disse tied wör funk ook mear en mear geleefd bie t grote publiek.

90er joaren en 2000 bewark

Vanof de tachentiger joaren har funk vuural invlood op Dance en hiphop, duur de völle geluudsknipsels dee't gebroekt wörden. Binnen de hiphop was vuural n rapgroep Digital Underground ne vuurtzetting van de P-funk. Der köm zelfs ne opleawing van funk, den't mear met jazz samengung, met ärtieste as John Scofield, Medeski Martin & Wood of Soulive.

Doarnöast kom n Hammondbeat oawer oet Amerika, met völle instrumentele en zinnebekeukelende funkstukke, woerin't sniedende hammondörgels en wah-wah-gitaren ne belangrieke rolle hebt. Bekeande ärtieste hiervan beent The New Mastersounds, Breakestra, Speedometer, Big Boss Man, Galactic en The Bamboos.

Mer de daansmeziekgroepering blif nieje dinge proberen met funk, woeroet oonder mear Nu-Funk is ekömmen. Dit zeent vuural op evoorde hiphoppatronen en mangs zelf in espölde funk- en jazzstukke. Bekeande muzikaanten oet disse streuming zeent oonder mear Dr. Rubberfunk, Skeewiff, Lack of Afro, Chris Joss, Max Sedgley, Smoove, Thunderball en DJ Slow. Doarbie komt der ook geregeld, mangs naamloze, nommers op plaat of CD oet woerin't oolde soul-, funk-, jazz- en bluesnommers met elektronise ritmes vermengd zeent.

In Neerlaand bewark

In Neerlaand wörd ook al joaren funk emaakt, en de leste joaren is der wier ne opleawing van de stiel oet de zestiger en zeuwentiger joaren. Bekeande Neerlaandse funkgroepen zeent The Soul Snatchers, Rare Groove Orchestra en t AIFF.