Ioniese Zee
De Ioniese Zee (Grieks: Ιóνιo Πέλαγoς, Ionio Pelagos; Italiaans: Mar Ionico of Mar Ionio; Albanees: Deti Jon, 'Oonze Zee') lig op et zuudoosten van de Learze van Italië, op et oosten van Sisilië, op et zuudwesten van Albanië en op et westen van Griekenlaand. Et Kanaal van Otranto is de noordelike duurgaank met de Adriatiese Zee. De Stroat van Messina verbeendet de Ioniese Zee met de Tyrreense Zee. Al disse zeeën heurt bie de Middellaandse Zee.
De Ioniëse Eilaanden (Korfoe, Lefkas, Ithaka, Kefalonia en Zakynthos) op et oosten van disse zee heurt bie Griekenlaand.
De strekke Ionië oet de Klassieke Ooldhead lea juust neet an de Ioniese Zee. Disse strekke lea in Klean-Azië. Vuur nen hoop umliggende volker beduudden Ioniër "Griek". Wellicht at hier den naam van disse zee vort keump.
Volksverhaal oawer den naam Ioniese Zee bewark
Der was es nen moal nen mooien nimf, Io, dee as meid bie Hera an et woark gung. Et was een mirakels mooi meadken, woerduur as Zeus öar al rap meug lieden. Hera har dit wal duur, en wör al gaauw ofgeunstig. Um Io te beskoarmen tegen Hera's ofgeunst, teuverden Zeus öar um töt koo. Hera vernöm dit en eisten at Zeus öar de koo kado te doon. Zee gavven dee koo an den herder Argos. Argos was nen reus met hoonderd ogene en zelfs at he sleup har he nog twee ogene oawer um oawer zin vee te waken.
Zeus leut zik de keze neet van de stoete etten, en bevöl den vernemstigen Hermes um Io lös te kriegen. Hermes kon den oppergod vanzelfs niks oontzeggen en treuk doarumme noar Nemea, de stad woer as Argos Io "vaste" heuld. Noa at he wat met Argos ekuierd har, spölden Hermes een zo sloapverwekkend riedelken op zinne fluite, det zelfs Argos zinne beaide leste ogene ook dichte völlen. Hermes deed Argos rap den kop of en leut Io vrie. Toen as Hera dit vernöm steurden zee nen horzel, woerduur as de koo op hol sleug. Io daverden duur et hele laand en sprung bie Epirus van de klippen in zee; disse zee wör later Ioniese Zee neumd. In Egypte kreeg Io van Zeus öar normale lief wier. Et liek van Argos kreeg ook een vervolg: Hera nöm alle hoonderd ogene en streuiden dee oawer den start van öar leewste pauwe hen.
Zeet ook bewark
|
Commons: Ioniese Zee - plaatjes, filmkes en/of gelüüdsbestanden. |