Lemele is een dörp in de gemiente Ommen in de previnsie Aoveriessel. 't Lig an de voete van de Lemelerbarg. Op 1 jannewaori 2008 had Lemele 1.672 inwoners; op 1 jannewaori 2021 waren 't der 1.345.

Karke van Lemele

De naam Lemele is of-eleid van 't leem dat vrogger in en umme de Lemelerbarg is evunnen. Uut vondsten bie ofgravingen is ebleken dat 2000 jaor veur onze jaortelling mèènsen al op de barg ewoond hadden. De eerste keer dat Lemele in olde geschriften stiet vermeld is 1474.

De Tichelerieje bewark

De in Leiden geboren Carel Godefroi de Moen koch in 1840 een lap grond an de Ledeboerweg um der een stienpannen- en tichelfebriek op te richen. Onder de naam De Moen en Kompejons konnen mit medewarking van ds. Van Raalte, Dirk Blikman Kikkert en Elias Ravenhorst zien plannen wödden uut-evoerd. De Tichelerieje beud wark an zo'n dartig mèènsen. An de voet van de Lemelerbarg had e een mooi stekkien umdat leem de belangriekste grondstof van de febriek was.

Toen in 1855 't Aoveriessels kenaal tussen Almelo en Zwolle werd an-eleg, werd de febriek naor de Kingmaweg an dit kenaal verhuusd. Mä in de loop van de jaoren vertrokken alle kompejons stuk veur stuk uut de stienfebriek. As leste bleef Dirk Blikman Kikkert aover en den verkoch zien andeel an Marten Kingma. Tien jaor daornao had Marten Kingma de stienfebriek ummebouwd töt een zuvelfebriek, umdat de melkcentrifuge was uut-evunnen.

Recreasie en toerisme bewark

Lemele bödt met zien völle campings een uustekend plekkien veur toeristen die wilt fietsen in de umgeving en wilt kuieren aover de Lemelerbarg. An 't Zandènde is een zörgboerderieje, an de Karkweg zit een eetkefee met terras in de zunne, an de Lege Esweg is een kleine golfbane en an de Körteveldsweg disko Zaal Dijk. An de Lemelerweg hej vekaansiecentrum de Imminkhoeve, dat anepaste vekaansies anböd an lu mit een beparking.