Snapchat (oetsprekn as SNÄP-tsjät) is nen app vuur op smartphones. Met dissen app köant gebroekers mekoar foto's en filmkes steuren. Eankel leu dee as ook Snapchat hebt en den gebroeker volget, köant disse beelden zeen. Den gebroeker kan ook kiezen wee van zinne volgers et wal te zeen krig en wee neet. De beelden zeent op zin längst veer sekondes te bekieken. Doarnoa zeent ze vort. Ne oetzeundering hierop is de verhaal-meugelikhead, woerin as een beeld nen helen dag te bekieken blif, in samenhaank met aandere beelden dee as den gebroeker den dag plaatset.

Den app wörd et meest gebroekt vuur selfies. Oawer de beelden kan den gebroeker verskeaidene filters en opmaakprofielen plaatsen. Ook kan den app gezichten oetwesseln as den gebroeker der met iemand aanders op geet.

Volgens Snapchat zelf wörden der in mei 2015 mear as 2 miljard foto's en filmkes per dag roond esteurd. Snapchat Verhalen wörden 500 miljoen moal op nen dag bekekken. In November 2015 wörden der al 6 miljard filmkes op nen dag versteurd. De wearde van et bedrief Snapchat wörd inmiddels eskatt op 10 töt 20 miljard Amerikaanse dollar. In 2016 steeg Snapchat noar 7 miljard dagelikse filmkes.

Snapchat is in 2011 bedacht duur de Amerikanen Evan Spiegel, Bobby Murphy en Frank Reginald "Reggie" Brown IV. De meeste gebroekers zeent tusken de 13 en 23 joar oold.