t Stift is n doarp met n beskearmd doarpszicht in de Tweantse gemeente Deenkellaand in de Neerlaandse proveensie Oaveriessel. Töt an de gemeentelike herindeling van 2001 heurdn t bie de gemeente Weersel bie an. t Lig op t westn van Weersel.

Stiftskeark in t Stift
Achterkaante van de Stiftskeark
De Stiftshuze

In t Stift steet de Stiftskeark oet 1400 en de Stiftshuze dee't rechtevoort nich mear van ne stichting bint, mer onderhoaln wordt deur de leu dee dr in wont.

Geskiedenisse bewark

In 1142 wör de keark van Weersel met alle bezittings an de ridder Hugo van Buren doan. Töt dee tied was dizze keark ne kapel dee vanoet de Sunt-Plechelmusbasiliek in Olnzel beheard wör. Hugo van Buren treuk dr zik in terugge met zinne metgezeln, um ofzoonderd te leavn veur boote en gebed. n 14den september 1152 wör de kapel inwiedt as klooster. t Was eerst n benediktienerklooster veur beade poaters en zusters. De eerste joarhoonderden doarnoa wör t spul vake löagreufd deur Tweantse hearn, veural deur de Hearn van Soasel. Noa ne tied trökn de poaters weg, en bleavn de zusters alleen. Doarnoa wördn vrouwleu en meaks van staand in t klooster loatn veur ne degelike opvoding en onderwies. Heanig an kömn de reagels van de Benediktieners op n achtergroond, en noa 1500 wör t klooster helemoal n vrie oadelik sticht, woar nog wal elken dag ne misdienst höaldn wör.

Sunt-Matn 1523 braandn t wongedeelte van t klooster töt de groond too of. In 1626, doo at Oldzel deur de Spanjooln was innömn, beslötn de Stoatn van Oaveriessel det t Stift protestaants mos wordn, en ze deudn dr nen gerefformeerdn domie hen. De Stiftkeark wör kaal maakt noar Kalvinisties gebroek, en opniej inricht. Keuning Lodewiek Napoleon Bonaparte van Hollaand veund in 1809 dat de keark te klein was veur de grote Roomske gemeenskop van Weersel, en dat doarum t Stift better veur de kleine hervörmde gemeenskop was. De Roomsken kreegn geald um zelf ne keark te bouwn dat better op t antal roomske kearkgangers bereknd was. In 1932 wör t Stift duchtig anpakt en opknapt. In 1974 wördn de Stiftshuze, dee um 1800 ofbrökn warn, wier optrökn op öar oale funderings noar de oale teeknings oet 1750.

Eksterne verbeending bewark