Verskil tüsken versys van "Edda"

Der bestoat verskeaidene verhalen oawer de betekenis van t woord ''Edda''. Enen doarvan is det t woord lik op t Oold-Noorske woord det "Oawergrotmoo" betekent. Ne aandere verkloaring is det t woord of is eleaidt van t woord ''óðr'', wat "dichtkeunst" betekent. Ne doarde verkloaring is det t is of eleaidt van [[Oddi]], wat in de tied det de Edda eskrewen is, ne plaatse was woer at völle studeanten, woeroonder [[Snorri Sturluson]], oonderwies kregen. t Meest geloofweardige idee is det t is of eleidt van t [[Latiens]] as verkleainwoord "edo" (ik bedeanke [gedichten]), in noabootsing van t [[Oold-Ieslaands]]e "kredda" (biegeleuf), det is of eleaidt van t Latiense "credo", wat "ik geleuwe" betekent. t Woord ''Edda'' zelf kan wal ne verbastering wean in t [[Proto-Germaans]] as nen tegenhanger van t oolde [[Sanskriet]]-woord ''Veda'' (letterlik "könnigheaid").

De Dicht-Edda, ook bekeand as de Sæmundar Edda of de Euldere Edda, is ne verzameling van Oold-Noorse gedichten van t Ieslaandse haandskrift ''Codex Regius'' ('t Keuningsbook'). Nöast Snorri ziende Verhaal-Edda (zeet hieronder) is de Dicht-Edda de belangriekste welle oawer Noorse Mythologie en [[Germanen|Germaanse]] heeldenverhalen. t Eerste deel van t Keuningsbook hef gedichten dee't verhaalt van t opbouwen en ofbrekken van de Oold-Noorse mythologiese weareld en eankelverhalen oawer goden zo as [[Woden]], [[Donar]] en [[Heemdall]]. De gedichten in t tweede deel verhaalt van heelden en heeldinnen zo as [[Sigurd n Drakenslachter]], [[Brynhildr]] en [[Gunnar]].

t Keuningsbook wör in t 13de joarhoonderd dale skrewen, mear der is niks bekeand oawer woer at t ewest hef vuurdet t in [[1643]] bie [[Brynjólfur Sveinsson]], Bisskop van [[Skálholt]] terechte köm. Toewdertied warren der bekeande versies van Snorri's Edda in Ieslaand, mear gelearden beweert det der toewdestieds nog ne Edda was, de Euldere Edda, dee at heaidense gedichten inhar, dee at Snorri vake anhaalt. Toew at t Keuningsbook ontdekt wör, leek t der op det disse gedachte woarheaid was. Brynjólfur skreef t book too an Sæmundr n Gelearden, ne priester oet t 12de joarhoonderd. Ondaanks det disse gedachte duur de hudige gelearden wörd of ewezen, kom iej mangs nog wal n naam Sæmundar Edda tegen.

De Jungere Verhaal-Edda, ook bekeand as de Verhaal-Jungere Edda of Snorri's zien Edda (noar Snorri Sturluson, dee-t ze meant det de samensteller is), is n Ieslaands haandbook van dichtkeunst det ook völle mythologiese verhalen inhef. t Har as doel um Ieslaandse dichters en leazers oet te leggen wo at ze kleane vernemstigheden van t alliteratieve gedicht mossen begriepen en um vat te kriegen op de völle mythologiese verwiezings achter de völle [[kenning]]s dee't gebroekt wörden in skaldiese dichtkeunst.