Verskil tüsken versys van "Oosterskellings"

Lange tied is anneumen dat Oost- en West-Terskelling vri'j jonge kolonies op n in wezen Hollaandstaelig eilaand weren, van [[Friezen]] die oorspronkelik uut de [[Zuudwesthoek]] ofkomstig weren. Mar tegenwoordig wordt anneumen dat de taelsituaosie zo as t now is op Terskelling, mit twie Friese dialekten op de'e uutaenden en n Hollaands dialekt in t midden, veroorzaakt is deur n ieuwelange overheersing deur [[Hollaand]] van t oorspronkelik hielendal Friestaelige eilaand. Daornaost was [[Midslaand]] t bestuurssentrum en is de bevolking daor staorigan verhollaandst. Hier moet bi'j opmurken worden, dat Terskelling eerst in [[1942]] n onderdiel van de perveensie [[Frieslaand]] worden is; veur die tied beheurden t ieuwenlaank tot Hollaand.

Behalven n starke invloed van t Hollaands is der in t Oosterskellings ok n lichte [[Noord-Germaanse talen|Noord-Germaanse]] invloed weeromme te vienen. I'j kunnen annemen dat dat voortkomt uut t feit dat de Terskellingse maotskoppi'je ieuwenlaank op de'e zee oriënteerd was - mit viskeri'je en haandel as veurnaemste inkomstebronnen - waor kontakten mit [[Skandinavië|Skandinaviese laanden]] of luden uut die kontreinen geriegeld bi'j veurkwammen. n Veurbield van die invloed is bi'jgelieks t woord "''jeure''" veur "doen". Vergeliek t [[Deens]]e "''gøre''", t [[Sveeds|Zweedse]] "''göra''" en t [[Noors]]e "''gjøre''", waorbi'j bedocht worden moet dat in de [[Noord-Germaanse taelen]], behalven t Deens, n "g" veur in "ø" uutspreuken wordt as in j-achtige klaank.