'''Geen-Frysk''' (sumtieds misheurd as '''Gay-Frysk''') is n noam dij deur summege [[Frieslaand|Fraise]] jongluu 'ien vòlksmond' wel ains broekt wordt en dij verwiest noar n [[sosjolekt]]ische variant van [[Westlaauwers Frais|Frais]]. Liek as aal aander streektoalen ien [[Nederlaand]] het Westlaauwers Frais last van Nederlaandse ienvloud. Al hebben nog n hail ìnde kiender t Frais as eerste toal, toch is, deur schoulen en deur de media, t [[Nederlaands]] de standoard worden veur 'normoal proaten'. Jongluu dij 'overdreven Frais' proaten, doar wordt van zègd dat dij "GayGeen-Frysk" proaten; dus ''Frais woarbie ollerwetse woorden, dij n ìnd van t Hollaands òfstoan, broekt worden dij ien t gewone leven van aaldoag nait meer broekt worden''. n Veurbeeld hiervan is t olderwetsere Fraise woord ''kaai'' (sleutel) ien ploats van t Nederlaandse ''sleutel''.
==Grìns==
Dit GayGeen-Frysk is nait n bepoalde vörm en kin dus per persoon aans wezen woar of aine de grìns tuzzen "gewoon Frais" en "GayGeen Frais" lèggen dut. Zo zel ien grotere ploatsen as [[Drachten]] en [[Liwwadden|laiwerd]] de grìns leger liggen as ien lutje lougen. Maisttieds het dizze grìns te moaken mit zulfstandege noamwoorden. Voak worden hierveur ien stee Hollaandse woorden broekt dij sumtieds wel 'verfraist' worden. Waarkwoorden en heur verschaaidene vörms blieven maisttieds wel ien staand, omdat dij meer toalgevuil vroagen en dat hebben luu voak wel. Woord wordt aigelks allen broekt deur en veur jongluu. Van olle mìnzen wordt t wel normoal vonden om 'puur' Frais te proaten.
Nait allend t sproken Frais, mòr ook t Frais dat haildaal aan de offisjele Fraise schriefwies voldut wordt zain as GayGeen-Frysk.
==Noam==
Noam ''GayGeen-Frysk'' komt van [[Engels]]e woord 'gay' dat 'homoseksuweel' betaikent, mòr t het doar aans niks te moaken. Tegenswoordeg wordt woord 'gay', zowel ien Nederlaands as Engels, ookwörd broekt om aan te geven dat t aine nait zint, omreden t te veul gaait zo as vòlgens de ollere generoatsies heurt. t Is dus aigelks t tegenwoord van 'cool'. Zo as eerder nuimd, is Hollaands standerd worden. Ollere generoatsies willen geern t Frais beholden deur t zo zuver meugelk over te brengen, mòr nait elke Fraise jongere het doar verlet van en verzet hom doar dus tegen deur de verwoaterde vörm van Frais te priezen. t Gevòlg van dizze benoamen is dat de 'pure' vörm van t Frais ontmoudegd wordt en t zokzulf dus aiglieks van binnen oet stokkend moakt. Vrumd verschiensel is t aans nait. Ook ien Nederlaands kent man dit verschiensel woarbie olle woorden laanksoam mit minneghaid aankeken worden. Zin as "''De lieden, die sedert eniger wijl waren uitgeweken naar een andere contrei, waren van veronderstelling dat zulk een rijwiel gewis de ambiëringen zou betrachten, maar lieten terstond hun mond toen zich een zwaar gekwetste in het etablissement begaf.''" zel ien n doagelks gesprek ook zain worden as ol roakeltoal.
