Stadjer

Stadjer (ook stadjeder) is n Grunneger benoamen veur n bewoner van de stad Grunnen, ook wel Grunneger nuimd. Letterliek betaikent stadjer: ain dij in Stad (Grunnen) woont. De benoamen Stad (zunder lidwoord) holdt verbaand mit de noam van t Grunneger gewest tiedens de Repebliek (1594-1798): Stad en Lande.

Voak wordt t woord ook bruukt om verschil te moaken tussen studìnten (benoam as dij boeten Stad opgruid binnen en veur heur studie noar Stad kommen binnen) en nait-studìnten (de stadjers; as tegenhanger hiervan wordt in aander studìntensteden t woord börgers bruukt).

Stadjers hebben as bienoam 'mollebonen'. n Olle schimpnoam veur stadjers zel 'kluinkoppen' west wezen. In de joargang 1804 van t (Grunneger) Weekblad tot Nut van ’t Algemeen schreef Mattheus van Heyningen Bosch, alias Burgerhart, dat t n noam was dij Nederlanders (mor benoam Vraizen, Geldersen en Hollanders) aan Grunnegers gaven.