Stellingwarver schrieveri'je

Stellingwarfse literatuur is literatuur schreven in et Stellingwarfs. Om et begrip breder te trekken en diskussies over literatuur te veurkomen, gebruken Stellingwarver schrievers en de Stellingwarver Schrieversronte vaeke et begrip Stellingwarver Schrieveri'je. De Stellingwarver Schrieveri'je begint pas in de 1970'er jaoren op gaang te komen.

Veur 1970

Veur 1970 wodt et Stellingwarfs nog niet vule schreven. D'r verschienen in de tied van ruugweg 1800-1970 wel es wat riempies en kotte verhaelegies, mar et is nog niet zo gebrukelik om in et Stellingwarfs te schrieven. De eerste en ienige persoon die in disse tied regelmaotig van him heuren laot is de schriever Hendrik Johannes Bergveld (1902-1966). Zien riempies, verhaelegies en aandere stokkies verschenen in de kraanten. Bergveld het niet allieneg vule schreven, hi'j het ok naodocht over een spelling veur et Stellingwarfs paste zien eigen spelling ok konsekwent in zien wark toe.

Nao 1970

In 1971 wodde een diel van et wark van Bergveld postuum uutbrocht. Van De Oolde Pook wodden 1000 exemplaoren drokt in 1971, in 1976 was een twiede oplaoge neudig en wodden nog es 500 boekies drokt. In de jaoren zeuventig gebeurd d'r een protte mit de Stellingwarver schrieveri'je. In 1972 wodde de Stellingwarver Schrieversronte opricht om him veur de schrieveri'je in te zetten, in 1976 wodde de Bergveld-spelling vaastelegd. Om de Schrieversronte henne vormt him een groep schrievers waorvan o.a. Johan Veenstra en Hendrik Vondeling (1901-1992) hiel aktief en suksesvol bin. In 1981 wodde de H.J. Bergveld-pries veur publikaosies van literaire of taelkundige aord.

Henk Bloemhoff, Sietske Bloemhoff, Pieter Jonker en Karst Berkenbosch hebben een verscheidenhied an Stellingwarfer publikaosies schreven. Die verscheidenhied verschilt van taelkundige stokken, literaire warken en vertaeling tot informatieve boekwarken. Roely Bakker en Sjoukje Oosterloo schreven warken die veur een breder publiek toegaangkelik bin.