Koninkriek der Nederlaanden

Et Koninkryk der Neaderlanden (Neaderlandsk: Koninkrijk der Nederlanden) is nen suuvereynen ståt den besteet uut veer landen: Neaderland, Aruba, Kurasao en Sint Mårten. Et Statut van et Koninkryk der Neaderlanden uut 1954 reagelet de autonomy van de verskillende deylen van et koninkryk, wårdöär de Karibiske landen autonoom bünt, so dat disse medebeslisset oaver koninkryksangeleagenheyden, wår disse ouk vöär dy landen geldet. Mår ümdat den grondwet in Neaderland wördet opestelled, treadet dat land binnen et koninkryk en når et buutenland too up as verteagenwöördiger van et Koninkryk der Neaderlanden. Disse reageling wördet ümskreaven as nen verband med federåle trekken. Aruba, Kurasao en Sint Mårten hebbet elk nen eigen ståtsreageling, mår et jüridisken swårtepünt van et koninkryk ligget oaverduudelik in Neaderland. Van 1954 töt 1975 was ouk Süriname nen autonoom land binnen et koninkryk, net as de Neaderlandske Antillen tüsken 1954 en 2010.

Dit artikel is eskreaven in et achterhookske dialekt van Nysassiske Skryvwyse.