Hel (godin)

Hel is ne gudinne uut de germaanske mytology. Volgens dee verhalen is see heyrseresse oaver de lyknamige underwearld in et hyrnåmåls. See is ne dochter van plåggud Loki en röäsinne Angrboða, en süster van den wulv Fenrir en de wearldslange Jörmungandr. See is halv swart of blauw en halv vleyskklörig. Ouk hevt see en dunker, neaderslachtig vöärkummen.

Volgens de verhaaledda, et 13. eywske wark van den yslandsken Snorri Sturluson, hevt Wodan öär anestelled as heyrseresse oaver neagen wearlden med dårin en unnömelik antal hallen med untelbåre underdånen. Öär taak is underdak en eaten te versorgen vöär swakkeren en lüde dee van ölderdom estörven sint. De hallen hebbet unmündige poorten en houge müren.

Hel spöält ne döärslaggeavende rulle in de weaderupstanding van den gud Balder. Sou geyt den gud Hermóðr up anvråge van Frigg med et paerd Sleipnir når Hel üm te vrågen of Balder neet weader vry mag worden elåten. Dat mag van Hel, as et de guden lükket üm alle leavende saken up de wearld te låten rouwen vöär Balder. Alle weasens wilt dat, behalve de olde vrouwe Þökk, dee ne vermumde Loki blikt te weasen.