Verskil tüsken versys van "Driemaandelijkse Bladen"

tiedschrift over de Nedersaksische tael en de kultuur van Oost-Nederlaand
Verwijderde inhoud Toegevoegde inhoud
Ni'j
(Geen verskil)

Versy up 00:13, 19 aug 2021

De Driemaandelijkse Bladen, veureerst espeld as de Driemaandelijksche Bladen, was een in 1901 opezet, akkedemisch orienteerd tiedschrift mit artikels over de Nedersaksische tael en de kultuur van Oost-Nederlaand. Et was een uutgaeve van de Vereeniging tot onderzoek van Taal en Volksleven in het Oosten van Nederland.

Driemaandelijks(ch)e Bladen, eerste riege

Redaktie

Et tiedschrift stund anvankelk onder redaktie van taelkundige Johan Hendrik Gallée en schriever Gerrit Jan Klokman, beidend uut de Achterhoek, bi'jestaone deur mitwarkers uut aandere Oost-Nederlaandse regio's. Vanof 1909 deu de Grunnings-Drèentse onderwiezer Jan Bergsma de redaktie.

Inhold

In de Driemaandelijkse Bladen wodden bericht over volksgebruken, volksgeleuf, naemkunde en volkstael (de dialekten van et Nedersaksisch, in plaetse van de van bovenof introduceerde Nederlaandse ienheidstael). Der wodden woordverzaemelingen prissenteerd van specifieke plaetsen of gebieden, zoas Gallée zien woordverzaemeling van de Gelders-Overiesselse dialekten.[1] Ok kooj der Nedersaksischtaelige verhaelen in vienden, zoas van de Zwollenaar Willem Kloeke.[2] Wieder had de studie van de Nedersaksische literetuur een stee, en bi'jdraeges die ingongen op de saemenhang van et Nedersaksisch en et Platduuts.

Laetere geschiedenis

In et krisisjaor 1931 hulden de Driemaandelijkse Bladen op te verschienen, mar in 1949 wodden een ni'je riege opezet. Hierveur wodden een verieniging opericht deur de Twèentse taelkundige Herman Bezoen en de Drèentse taelkundige Jan Naarding. In 1955 wodden et tiedschrift et orgaen van et Nedersaksisch Instituut van de Rieksuniversiteit Grunningen. In 2002 was er vanni'js ofeleupen mit de Driemaandelijkse Bladen.[3][4]

Vanof 2020 verschient et Jaorboek Nedersaksisch, uutegeven deur Stichting Sasland en boekenbestellen.nl, dat veurzien wil in de liemte die as ontstaon was naodat de Driemaandelijkse Bladen dermit uutscheidden.[5]

Rifferenties

  1. Biografisch Woordenboek Gelderland: Johan Hendrik Gallée
  2. Wie is wie in Overijssel: Willem Kloeke
  3. Geheugen van Drenthe over de Driemaandelijkse Bladen
  4. Ludger Kremer (2008), 'Geschiedenis van de Nedersaksische taalkunde'. In Henk Bloemhoff, Jurjen van der Kooi, Hermann Niebaum en Siemon Reker (red.), Handboek Nedersaksische Taal- en Letterkunde. Assen: Van Gorcum
  5. Neerlandistiek. Online tijdschrift voor taal- en letterkunde: artikel 'Pas verschenen: Jaorboek Nedersaksisch 1 (2020)' (7 december 2020)
  Dit stok is eschreven in et Stellingwarfs van de Kop van Overiessel.