Verskil tüsken versys van "Wikipedia:Praothoek"

Hartstikkene beste meensken, veur et Stellingwarfs hewwe een hiele beste schriefwieze. De meensken kunnen et goed lezen én begriepen en daordeur funktioneert et Stellingwarfs in de praktiek as een standaordtael. Wi'j hebben nooit vule diskussie over de schriefwieze had en we maeken op de schoelen ok van disse schriefwieze gebruuk. Ie kunnen d'r veul van vienen, mar de meensken bin d'r bi'j oons slim wies mit. Et antal verkochte Stellingwarver boeken leit relatief hoog aj' et mit ere Nedersaksische/Nederduutse dialekten vergelieken. Et schoelmateriaol is d'r ok al en we perberen et allegeer wel uut te bouwen, mar veur oons bin d'r amper beparkingen. Now begriep ik dat zoks veur bi'jgelieks et Twents eers is. Vief schriefwiezen bin ok hiel wat en zoks helpt de tael niet veerder. Mar zoas ik krek al angaf, wi'j hebben dat probleem hielemaole niet. Wi'j hebben een relatief laange spellingstradisie en oonze schriefwieze wodt ok deur de gemeenschop aksepteerd. Now heb ik vandaege in et ''Stellingwarver artikel'' over et [[Fransk|Fraans]] zien dat daor de Ni'jsaksische schriefwieze bruukt wodde. Now vien ik een ere schriefwieze over et algemien wel interessaant en ik stao d'r wisse wel eupen veur, mar niet as et Stellingwarfs daordeur een vremde tael wodt. Op de diskussiepagina bi'j et artikel [[Fransk|Fraans]] hadde ik al angeven dat de tael die daor bruukt wodde niet iens op et Stellingwarfs liekt. Vot wodde de pagina weerommezet en et was daon mit al mien wark. Zunder in te gaon op de tael die daor staot wodde mien wark vothaeld. Dat zol niet de manier moeten wezen hoe wi'j hier mit mekeer ommegaon. Een stevige diskussie en een grap bin prima, mar een inhooldelike diskussie op een kennisplatvorm as Wikipedia uut de weg gaon is niet gezond veur dit projekt. Ik begriep dat d'r hier goenend bin die stommegraeg meer in een ere schriefwieze doen willen en daor he'k ok alle respekt veur, mar perbeer et ok een betien van de Stellingwarver kaante te bekieken. Mit hattelike groeten --[[Gebruker:Stellingwerver|Stellingwerver]] ([[Overleg gebruker:Stellingwerver|overleg]]) 21:18, 7 jan 2022 (CET)