Volleybal
Volleybal is nen balsport woerbie as een spölveeld van 9 bie 18 meter opdeeld is in twee lieke helften met een net der tusken. Op iedere helfte steet een manskap van 6 spöllers. Disse mut proberen nen bal oawer et net, tusken twee rechtopstoande stökke duur, bie den tegenstaander binnen de lienen van et veeld vuur de groond te kriegen. As det lukket of as den tegenstaander nen fout maakt, krig et manskap wat opslöt nen peunt. Wee as der as eerste 25 peunten hef, wint nen set. Bie dree sets wint et manskap den wedstried. Bie nen gelieken staand (2-2) in sets, doert nen wedstried een extra set länger. Hierin zeent mer 15 peunten te verdenen. Tiedens dissen beslissenden set wesselt de teams van spölkaante noa de eerste 8 peunten.
Duur de joaren zeent der een antal soorten volleybal ontstoan: zitvolleybal, minivolleybal en straandvolleybal.
Spelregels bewark
Spölveeld bewark
Et spölveeld mut ne oppervlakte van 9 bie 18 meter hebben.
Belangriekste regels bewark
- Spöllers magnt del bal mer heel kort anraken (den skeidsrechter bepoalt dit).
- Spöllers magnt den bal neet twee moal achter mekaander anraken, behalve bie een blok (blokkering).
- Ieder team mag heugstens dree moal achter mekoar den bal anraken vuur at he oawer et net geet. Vuur een blok geeldt dit neet.
- Den bal mag neet tegen de antennes of aandere zaken boeten et veeld kommen.
- Et net en de reande magnt neet eraakt worden.
- Nen spöller mag neet oonder et net duur bie den tegenstaander op de helfte kommen. Zelfs neet met de veute. De middelliene geeldt doarbie vuur beaide partiejen.
- Teams kriegnt een peunt as ze met den bal et veeld van den tegenstaander raakt (binnen of op de lienen) of as den tegenstaander nen fout maakt.
- Wint een team ne peunte, dan kriegnt ze ook et recht van opsloan (de eerste slag van ne buurte doon).
- Vuur den anvaank van ne buurte mag nen spöller ewesseld worden. Ieder manskap mag zes man te set wesselen. Nen ewesselden spöller mag vuur denzelfden spöller terugge wesseld worden, mer doarnoa neet nog es. Det geeldt as twee wessels van de zesse.
- Ieder manskap mag twee time-outs (pauzes) per set nemmen.
- Achterspöllers magnt den bal neet oawer et net spöllen as ze binnen et dreemetergebeed zeent en den bal op det ogenblik boawen et net is.
- Een manskap mag ginnen anval opzetten as den libero (verdeadigingsspesjalist) nen boawenhaandsen pass gef in et dreemetergebeed.
Verleden bewark
An et Engelse hof van de doomoalige keuniginne Elizabeth wör in et 16de joarhoonderd al iets espöld wat op volleybal leek. Det blik oet tekeninge oet dee tied. Offisjeel geeldt den Amerikaan William G. Morgan as oetdeanker van et spel. As sportleader bie de Young Men Christian Association (YMCA) in Massachusetts gavven hee oonder mear les an een koppel euldere zakenleu. In dee tied besteund basketbal al, mer det veund hee te hard vuur disse leu. Doarumme dachten hee in 1895 een aander spel oet.
Hee nöm regels oet et tennis, basketbal en honkbal en maakten doarmet de volleybalregels. Den bal mos zoonder an de groond te kommen oawer et net espöld worden. Et roondspöllen neumden hee volley. Een netservice meug een moal oawer edoan worden en töt een meter vuur et net meug den spöller dribbelen met den bal (ne vuur oezelf umhoge spöllen). Um de vingers van de vrouwleu te beskoarmen, meugen zee den bal eerst opvangen en dan wier opsmieten. Nen wedstried har meardere innings (spölroondes). Nen inning was vuurbie as alle spöllers van beaide manskappen ne opslagbuurte had harren. Et spel was één tegen ene te spöllen, mer ook tiene tegen tiene.
De YMCA veund et wal wat en bedachten der nog nieje dinge bie: