Abortus

WIKIPEDIA kan der nit vöär instån dat de inhold van artikels kloppet.
As jy wat mankeret, kün jy et beste eaven by een dokter angån.

Abortus, abortus (arte) provocatus (van latyn: aboriri, vergån of verlöären gån en provocare, upwekken), abortus provocatus lege artis, upsettelike vruchtafdryving of swangerskopsofbreaking is et vöärtydig afbreaken van swangerskop döär en embryo of foetus vord te halen. In et neaderlandske språkgebeed küert se meysttyds kortweg van abortus vöär disse handeling. A'j in de mediske wearld enkel abortus segt, meynet se dat y ne vöärtydige geboarde of miskråm bedolet. Nen miskråm nöömt de mediske lüde ouk wal ne spontane abortus.

Wårümme as vrouwlüde vöär nen abortus keset, verskilt stark van menske töt menske. Et kan weasen dat öäre gesundheid döär den swangerskop selv in gevår kümt, dat se meynet et kind neet to künnen underholden, döär hüselik gewald, as se gin hülpe üm sik hen verwachtet, as se sik to jung völet, as se noch de skole willet afmaken, as se et neet by de warkloupbane by künnet gebruken of as se verkracht sint un et kind neet grout willet brengen.

Oaver de heyle wearld wordet et jår ungeväär 44 miljoon abortusse uutevoord. Ungeväär de hälvde dårvan is knooiwark. In landen wåras se et döärgåns medisk good up de rygel hebbet geldt abortus as årdig veilig. Mär döärdat abortus vake ook illegaal wördt uutevoord sunder gode vöär- un nåpleyge, starvet der up de wearld alle jåren sou'n 70.000 vrouwlüde döär nen verknooiden abortus. 5 miljoon vrouwlüde kummet der med in et sekenhuus to liggen. De lätste jåren blyvet disse cyfers årdig lyk.

Wo as et wettelik eregeld is, wat de lüde der van meynet un wo der vanuut et gelöyv når ekeaken wördt is in alle landen anders. Landen wåras abortus by wet mag, ståt et to up grund van döärdachte kritikpunten. Sou kan abortus goodeköärd worden as de moder verkracht is, de vrucht sik neet good untwikkelt un höygeren kans up nen handicap hevt, as de moder syne gesundheid in gevår is of as de moder et uutendelike kind neet good kan underholden.

Abortus vindet de lüde wearldwyd lastig üm oaver to küeren. Wat lüde seet abortus as ne ård leavensbeendiging van lüde wat sikselv neet verwären künnet. Anderen meynet dat abortus good kan a'j der vro genog by sint; dan is et kind noch neet untwikkeld.

Swangerskopsduur

Üm to bepålen of ne swangerskop wal of neet beendigd worden mag, kyket de doktoren når wo lange as de vrouwe al underweg is seyd et lätste mål menstrueren un of et kind leavensvatbår is buten et moderlyf ümme. Dat is et meysttyds sou rund de 24 weaken swangerskop. Ümdat et by ydere swangerskop anders is, holdet dokters in Neaderland up syn meyst 21 weaken an vöär de seykerheid.

Dår steyt teagenoaver dat kinder dee to vro geboaren wordet, döär nye technologyen vöäle vroger al in leaven ehölden worden künnet. Dårdöär verskuvt de tyd moreel eseen ouk weader når vöären.

Mediske metoden

Al sou lange de menskheid besteyt, proberet vrouwlüde mangs up allerhande wysen nen swangerskop of te breaken. Rechtevoord hebbet se der medicynen vöär un gynaekologiske of operatyve ingreypen.

Abortuspille

Seyd den 1. february 2000 künnet vrouwlüde in Neaderland de abortuspille (mifepriston, oorsprungelik registreerd as RU 486) krygen. Den kan esluked worden töt 63 dage nå den eyrsten dag nå de menstruaty (= 5 weaken oaver tyd). In 83% van de gevallen maakt disse pille de swangerskopsvrucht lös van de boarmoderwande, wat nen abortus veroorzaket. Tüsken de 1 un 3 dage later krigt de vrouwe misoprostol wårmed as de weyen upewekked wordet.

Vordsugen

By de vordsuugmetode (neaderlandskː zuigcurettage) halet se de vrücht weg döär en pypken in to brengen un dår ne vakuumpumpe up an to sluten. Disse metode kan enkel töt 12 weaken swangerskop by vrouwlüde dee noch neet eyrder kinder had hebbet un töt 14 weaken weaken by vrouwlüde dee wal al eyrder kinder had hebbet, ümdat de lyfsdeylen van den vrücht dan to grout wordet üm der döär te passen.

Vrouwlüde wat 16 dage töt 14 weaken swanger sint kryget mangs verdöyving vöär disse metode, ümdat de boarmoderhals uperekked wördt. Al med al duurt et sou'n 15 minuten un de vrouwe kan meysttyds denselvden dag alweader up et huus an.

Prostaglandinebehandeling

Ne prestaglandinebehandeling krigt ne vrouwe döärgåns vanaf ne swangerskop van meyr as 13 weaken. Den dokter trekt dårby et vrüchtvlees kaput, wårdöär et vrüchtwater vordlöpt un de vrücht in den boarmoder starvt. De vrouwe krigt dan ne spoite med weyenupwekkende prostaglandinen. Nå 6 töt 12 uur bevalt see van nen douden vrücht. By disse behandeling krigt de vrouwe verdöyving teagen de seyrde.

Uprekken un vordhalen

In dokterstermen Dilataty un Evakuaty (D&E), of embryotomy, kan vanaf de 12. töt 24. weake van de swangerskop. De vrouwe krigt ne verdöyving un dan med dilatatoren (uprekkers) de boarmoderhals uperekked. Med ne spoite med prostaglandines (meysttyds mosprostol) wördt dat eynvoldiger. Meysttyds starvt den vrücht an de prostaglandines. Ouk kan nen dokter et harte van den vrücht inspoiten med kaliumchloride. Med ne tange halet se dårnå de boarmoder löädig.

Keisersneyde

As uprekken un vordhalen neet kan, keset de dokters mangs vöär nen keisersneyde. Mär dit kümt håste neet vöär.

Köykelwark

As der üm wat vöär readen dan ouk ginnen dokter by ehaald kan worden, künnet vrouwlüde mangs gevöärlike metoden kesen üm selv abortus to pleygen. Mangs låtet vrouwlüde sik van de trappe vallen, of spoitet sik med nen klysma seype in den boarmoder. Ouk sint der lüde dee illegaal abortussen uutvoret. In Neaderland nömet se dat mangs 'engelkesmakers'. Dee krygt en paar cent in de hande un versöket dan med ne breinålde döär de vagina un boarmodermund den vrücht to steaken. Dat geyt neet altyd good.

Dit knoibuksenwark kümt vake en ende an as en land abortus by wet goodköärt. Toch blyvet der altyd vrouwlüde wat sik skamet dat se swanger wörden sint. Dee proberet et dan buten de vaste mediske kringe ümme. In verskeidene landen künnet dokters sunder oaverleg med de olden nen abortus uutvoren as et üm heyle junge mäkens geyt dee as et neet med de olden dörvet to beküeren.