Adel
Den adel is ne geslotten maotschoppeleke klasse mit völ anzeen in ne staandenmaotschoppi-je. Den Europesen adel van vandage is histories ontstaon in staandenmaotschoppi-jen van veur de Fraanse Revolusie. In veule maotschoppi-jvörmen is ne beveurrechte klasse an te wiezen en et véurkommen van ne dergeleke klasse is van alle tieden. Ok de olde Grieken, de Romeinse republeek, Aziatiese volkeren en Afrikaanse stammen kent, under verskillende namen, euren adel.
Den adel kenmarkt zich deur:
- arfelekheid: adeldom wödt verkreggen deur geboorte, en geet dus ovver van olders op kinder. Ni-je families en leu wödden alleneg bi-j uutzundering in den adelstaand op-enommen;
- geslotenheid: den adel is ne ofzunderleke en geslotten groep, zunder veul sociale veurtbeweaging. Wi-j künt van ne geslotten kaste spreaken. Zie trouwt onderling en ok wanneer nen buutenstaonder de betrekking, leafwieze en riekdom van de edelen hef verworven kan hi-j neet zunder meer edelman wödden;
- veurrechten: de titels van de edelleu en eure veurrechten wödden in de wet vast-elegd. In Nederlaand hef den adel gene biezundere veurrechten meer, maor de namen en titels bunt bescharmd deur de wet.