Albert Dening

Albert Dening (Slien, 1873 - Amsterdam, 1949) was een Drèentse dichter en schriever van vertellegies.

Zien olders hadden een café/stalholderi'je/boerenspil. Töt zien vierentwintigste hef Albert bi'j zien va ewarkt. In zien vri'je tied deu hi'j zölfstudie. Daornao hef hi'j bi'j de douane ewarkt, op 't lest in Amsterdam.

Nao zien pensionering in 1934 begunden Dening Drèentstalige gedichten en vertellegies te schrieven. Zien gedichten stunden veural in 't maandblad Drent(h)e, de Nieuwe Drentsche Volksalmanak, in kraanten en op kalenders. Uut zien gedichten sprek winst naor vrogger en Drenthe. Hi'j schreef ok liedteksten, zoas Drente-lied, Drentse Jongs, Het Drentse Wicht en Een Drents volkslied.

Anhaling

't Was donkeroavend. 't Wark was veur die dag doan en de hoesholling van Jan Henning zat in 't schemeruur stil bij 'n kanner. Voader Henning staarde in gedachten verzunken noa de doovende en dan weer oplaaiende vlammegies van 't zoddenvuur. 'n Leven van veul tegenslag had hum zwoormoedig maakt. Hij was aaltied 'n warkzame man west en dee nog van vro tot laat zien best in 't boerderijgien, mor zien harde arbeid had hum niet veul geven. As boerenknecht had' met groote zunigheid zon kleine zeshonderd gulden bij 'n kanner spaard en doar wazze doe met introuwd bij zien vrouws stiefvoader, die 't geld er deur bracht in drank en met verkeerde handel op marken en verkoopings. Met mooie beloften had' de jonge man 't geld ofhandig maakt. Op 'n murgen was dat zoo mor op de deel van 'n kanner bracht. Jan Henning had hum het muujzaam vergaarde geld op d'hakselkist veurteld, alles in goed vertrouwen en zunner ienig bewies; nooit was er 'n cent weer van terecht kommen. Doe zien schoonvoader overleden was, hoopte Henning, dat er beter tied zul anbreken, mor och, as de boedel verschuld is, en ij zit op 'n huurspil, dan is er joa gien doen an. 't Was nog 'n geluk dat er an 't hoes harbarge en lozement verbunnen was, dat gaf met markdage en zoo nog wat inkomsten, mor 't bleef toch knooien.

Uut: Um d'olde Toren

Uutegeven waark

• Um d'olde Toren (1944, eerst verschenen as fulleton in 't Agrarisch Nieuwsblad onder 't pseudoniem D. Enniga)
• Oet 't olde darp (1947, eerst verschenen as fulleton in 't Agrarisch Nieuwsblad onder 't pseudoniem D. Enniga)
• Oet oes eigen Drenthe. Een bundel korte verhalen uit het land van hei en struiken (1949, postuum, eerder epubliceerd in de Provinciale Drentsche en Asser Courant)

Bronnen

• Broersma, Rouke (red.) (2003), Scheupers van de taol: Bloemlezing van de Drèentse Schrieverij 1837-2003, Zuudwolde: Het Drentse Boek (p.39-40)
• Encyclopedie Drenthe Online

Dit stok is eskreven in 't Zuudwest-Zuud-Drèents van de Drèents-Oaveriesselse grèensstreek.