Ben Smits
Bernard (Ben) Smits (Amsterdam, 6 november 1929 - 't Vene, 5 meert 2008) was een Nederlaanse pianopedagoog en pianist. Hi'j heurden mit de pianopedagoog Jan Wijn töt een selecte groep pianisten die heur opleiding kregen van de pedagoog Cornelius Berkhout (1892-1958). Smits hef ok lessen ehad van Clara Haskil en Bela Siki (die zölf weer leerling ewest hef van Dinu Lipatti). In dizze tied hef Smits verscheiden opnaomes emeuken veur de radio in Zwitserlaand.
Smits warkten eerst as heufdvakdocent piano an de conservatoriumofdieling van 't Amsterdams Muzieklyceum. In 1963 was hi'j actief bi'j 't opzetten van een meziekschoele op Curaçao, daoras hi'j ok directeur van wördden. Op Curaçao, daoras e töt haalverwegens 1971 ebleben is, hef e diverse culturele prejecten organiseerd. In 1975 is e heufdvakdocent piano ewörden an 't Zwolse Conservatorium. Daornaost was e vanof 1971 jaorenlaank directeur van 'e meziekschoele 'De Rinkelbom' op 't Vene in Frieslaand. Sund 1996 was e mit pensioen.
Smits hef in veule laanden solist en begeleider ewest, onder aandern van Jo Juda, indertied concertmeester van 't Concertgebouworkest, en vörmden mit zien vrouwe Greta Lang een pianospeulduo.[1]
Mit Albert Brussee redigeerden Smits de naolaotenschop van Cornelius Berkhout, wat risselteerden in die zien boek 'De Kunst van het Pianospel'.
Ben Smits hef ginneraosies pianisten op-eleid, daorunder Jeroen Riemsdijk, Tjako van Schie, Lieven Sienema, Tanja Dijksterhuis en nog veule aandern. De dochter van Ben Smits en Greta Lang is de celliste Pamela Smits.[2]
Rifferenties
bewark
|
Dit stok is eskreven in 't Zuudwest-Zuud-Drèents van de Drèents-Oaveriesselse grèensstreek. |