Bibliotheek

Nen bibliotheek (mangs oet esprökn as bieblteek, en ok wal of ekörtt töt bieb), beukerieje of bookhalle, is van ooldsher n gebouw woer at beuke, tiedskriftn en blaadn bewoard wordt. Dee kö'j leenn, en mangs koopn. Rechtevoort hebt ze ok vake cd-roms en dvd's, en dr bestoat ok helemoal digitale bibliotheekn.

Skapn met beuke in ne bookhalle

n Naamn bibliotheek keump van t Griekse βιβλιοθηκη bibliothèkè, wat bookbewoarplaatse beteeknt.

Soortn

Dr zeent verskilnde soortn bookhaln. In de weetnskoppelike bookhalle wordt akademiese woarkn verzameld en oet eleend. Ze zeent vake verbeundn an ne universiteat en mangs zelfs an één vakgroep, woervan en woervuur at ze de dan zo völle meugelik informatie opzeukt en opsloat.

In de openbare bookhalle köant leu zik inskriewn en beuke en muziek leenn. Ze köant oawer oeteenloopnde oonderwoarpn dinge opzeukn. Ook wordt hier völle leasbeuke (romans) oet eleend. Nen variaant hierop is de Keunstoetleen, woerbiej at leu n keunstwoark vuur nen bepoalden tied köant leenn en in thoes an de mure köant hangn.

In de muziekbookhalle bewoart ze bladmuziek. Dit is vake vuur muziekskooln, konservatoria en verskilnde muziekvereniges.

Websteas

Vake hebt al disse soortn bookhaln ne eegne webstea, woerop at t gehele anbod van öare verzameling te duurloopn is. Met ne heandige zeukmesiene is dr dan op titel, skriewer, joar van oetgaawe, ezw, te zeukn noar beuke dee'j neudig hebt.

Oetgoande verbeending

• webstea van de Neerlaandse Openbare Bibliotheek