Derk Sibolt Hovinga

Derk Sibolt Hovinga (1909-1990) was n Grunnegstoaleg dichter.

Hovinga, dij twij joar Olde Toalen studaaierd haar, was boer ien t Oldambt. In zien jonge joaren was hai lid van de NSB, moar loater har hai doar spiet van. Hai schreef benoam over de natuur en de Grunneger kultuur van dizze streek. Ook goan summege gedichten over historische onderwaarpen, mythologie, volksverhoal en mystieke ervoarens. Hai het negen dichtbundels oetgeven. Hovinga was ien joaren vieftig redacteur van t tiedschrift veur Nedersaksische literetuur 't Swieniegeltje en druig doar gedichten en boukbesprekens aan bie.

Ien 1983 het Hovinga de Literaire Pries van Stichting 't Grunneger Bouk oetlangd kregen veur zien dichterij.

Omreden zien waark as hail muzikoal zain wordt, het t projekt Oost-Groninger Wereldmuziek summege van zien 'laiden' op muziek zet en ien 2008 ien Oostwòld, nait wied van zien vrougere woonhoes, speuld en zongen.

Marten Grupstra het n borstbeeld van Hovinga môkt, en H.B. Reininga het n biogroafie van hom schreven, Derk Sibolt Hovinga: Dichter en boer. De waarheid achter de mythe (2007). t D.S. Hovinga-fonds geft zien gedichten opnij oet en subsidieert wiedere Grunnegstoalege kultuuroetingen.

Zitoat

O nacht
Het aailand rust.
Ik stoa mit die allain
Hier aan de leste kust
En om ons roest de zee.

O wenst,
Het aiweg laid,
Dat in en om ons waait,
En het gain enne nait,
En roest ook in de zee.

Oet t gedicht t Aailand van geluk

Waark

• Störm en stilte (1952)
• Miemern in tweiduustern (1960)
• Oogst van mien aner laand (1968)
• Noar 't Adrillenmaart in Winschoot
• De raaize noar Peries van twei Oldamster boeren, deur ain van heur vertelt anno 1939
• Balloaden, mythen, overleverns, gedichten en laiden van 't kustvolk (1980)
• Bloaren aan de levensboom (1982)
• Drei dichterlieke vertelsters (1983)

Versoamelbundels/tot den tou onoetbrocht waark

• Onder de regenboog (1987) - òfronden van zien waark
• Störm en Stilte/Miemern in twijduuster/Oost van mien aner laand (1992, herdrok 2000)
• Laiden van t Oldambt en t olle Loug veur 's oavends loat en 's mörnsvroug (1998) - noa zien dood oetgeven deur stichten D.S. Hovingafonds
• Luisteren naar het land. Het mystieke verlangen van de Groninger dichter D.S. Hovinga (2020) - Oldambt Historische Reeks, dail 5

Trivia

• D.S. Hovinga het bie de vrijmezzelderslòzie M.K.V. ien Winschoot en t Grunneger studìnten bittergenootschop Omlandia, subverain van Vindicat atque Polit zeten.
• Hovinga haar n veurlaifde veur de Ommelanden en doarom n zekere òfkeer tegen Stad. Doarom het hai t Grunnegs vòlkslaid, van Geert Teis, herschreven zodat Stad nait zo'n prominìnt stee meer haar, mòr dat de noadrok noar t Ommelaand kwam. Zo schreef hai nait van "Ain pronkjewail in golden raand, is Grönnen Stad en Ommelaand", mòr "Mien laand 's mien laand in roem verbaand, Doar bovenoet waast zien verstaand. Mien laand 's mien in roem verbaand, van Stad en loug en Laand.". Doarnoast het er n hail aander laid schreven mit de titel "Grunneger Volkslaid".

Wellen

• Projekt Oost-Groninger Wereldmuziek: Derk Sibolt Hovinga - Mien Aner Laand, mit demo's
• De Groninger Kroon: Expositie: "Derk Sibolt's poëzie verbeeld"
• F.G.W. Löwik (2003). De Twentse Beweging : strijd voor modersproake en eigenheid. Grunnen: Rieksuniversiteit Grunnen. Heufdst. zes
• Fokko Veldman en Hanny Diemer (2008). De literatuur van Groningen. Ien Henk Bloemhoff, Jurjen van der Kooi, Hermann Niebaum en Siemon Reker (red.), Handboek Nedersaksische Taal- en Letterkunde. Azzen: Van Gorcum

Bronnen / wellen: