De Grafeleke Toornmölle
De Grafeleke Toornmölle is ne toornmölle in Zerrem in de Nederlandse previnsie Gelderlaand. Dizze mölle is noar alle woarschienlekheid de oldste nog bestoande windmölle in Nederlaand.
Noar alle woarschienlekheid is de mölle veur 1441 ebouwd. Uut greujringenonderzeuk is eblekken dat et rechtervoogholt in de kappe ofkumstig is van nen boom den veur 1440 ekapt is. Tot in de 20ste eeuwe beheurden de mölle too an de heern en graven van Kasteel Huus Bargh. In 1839 wodden de inrichting van de mölle verni-jd. Noadat de mölle in de 20ste eeuwe in partikuliere hende kwam dreigden sloop, moar in 1929 wodden de mölle onder-ebrach in ne stichting. De mölle wodden in 1963, 1974, 1991 en 2005 restaureerd en moalt noe op vri-jwilligen boasis graon. De mölle hef twee koppel moalsteenn.
Et middeleeuwse bouwwark hef gans dikke muren en nog gans olde vloerplanken woarmet et éne van de meest bezundere möllen in Nederlaand is.
De boavenasse is deels van holt en deels van geetiezer. Et geetiezer kump uut 1861. Et iezeren deel is an de veur- en achterkante umvat in de olde holten asse.
De wieken hebt n oldhollaands tuug.
De mölle is nen binnenkruujer. De kappe wödt edraejd met hulpe van twee kroewarken en draejt op n Engels röllenkroewark. Et hele boaventoafeldeel is veur et kroewark veurzeen van kroekammen.
Den vang, woarmet de wieken stil-ezat könt wodden, is nen Vloamsen vang met 4 vangstukken.
De mölle is ne belangrieke toeristiese attraktie veur Zeddam. Et beheurt tot den Top 100 der Nederlaandsen UNESCO-monumenten.