De Mars (tiedschrift)
De Mars was een Aoveriessels maondblad aover alderhaande zaken die dizze pervincie anbelangden. 't Wördden opezet op initiatief van 't pervinciebestuur en verscheen van 1953 töt 1981. In de Raod van Bijstaand, later 't Stichtingsbestuur, zatten vertegenwoordigers van een hiele bulte subsidieerde Aoveriesselse instellings. De redactie was evenwal onofhaankelijk. De Twèentse schriever Johan Buursink hef een poze endredacteur ewest.
Een best antal journalisten, publicisten en fotografen hebt an De Mars mitewarkt. Der wördden eschreven aover culturele, maotschoppelijke, economische en toeristische zaken, en ien kunden der neisstokkies, interviews en in memoriams in vienden. Deur de langere, beschouwende artikels, mangs vergees bijedreugen as der krapan centerije was um schrievers te betalen, was De Mars een soortement podium veur journalisten.
't Tiedschrift beud ok plekke veur de regionalistische beweging en de Nedersaksische literetuur, mar der kwaamp drokte tussen 'Zwollenaren' of pervincialisten an de iene kaante en Twèentse regionalisten an de aandere kaante. ('Zwollenaren' of 'Zwolle' wördden ok wal gebruukt as pars pro toto um de pervincie Aoveriessel buten Twente mit an te duden.) De pervincialisten wolden mit De Mars de pervincie Aoveriessel as sociaal-culturele ienheid verdan hölpen. De Twèentse regionalisten richtten heur veural op de identiteit van de regio Twente en waren ok meer van de streektaal.
De Mars mus dermit uutscheiden toe as de pervincie bezunigde en der gien geld meer in wol stikken. Een echte opvolger is der nooit ekomen, al aosemt Twèents weekblad De Roskam nog wal de sfeer van De Mars.
Bronnen
bewark- Tuffeltoons Blog: De Mars, voormalig Overijssels tijdschrift
- Hendrik Entjes (1990), 'Streektaalliteraturen in Overijssel na 1945', in Jurjen van der Kooi (red.), Dialectliteratuur. Perspectief en balans van de moderne streektaalletterkunde in Oostnederland en Nederduitsland, Stad: Sasland
- F.G.H. Löwik (2003), De Twentse Beweging: strijd voor modersproake en eigenheid, Stad: Rieksuniversiteit Grunning
|
Dit artikel is eschreven in 't Zuudwest-Drèents. |