Dik Wessels

twentsken underneamer

Dirk (Dik) Wessels (Ryssen, den 2. april 1946 – den 21. november 2017) was nen twentsken underneamer.[1]

Leavensbeskryving bewark

Underneamerskap bewark

Dik Wessels güng in de sestiger jåren van de 19. eyw hen timmeren by Bouwbedryv Wessels, et bedryv wat syn vader Årend Wessels in 1933 stichted had en wat in 1960 med üm der by 4 man in deenst had. In 1968 nöm hee et van syn vader oaver. Med syn bröder Herman Wessels, den as der in 1974 by küm, wüst hee et bedryv uut te breiden töt 1250 man in 1990.[2]

In 1990 güng Bouwbedryv Wessels samen med IBB-Kondor wyder as Konder Wessels. In 1997 güng dat weader samen med de Köäninglike Volker Stevin wyder as Köäninglike Volker Wessels Stevin, wat vanaf 2002 name kreag as VolkerWessels, en bedryv med 120 warkmåtskappen en by mekander 16.000 man verspreid oaver meyrdere landen.[3] Vöär de centen dee as Wessels der med upstreak, stichteden hee in 1991 de investeringsmåtskappye Reggeborgh.[4] Reggeborgh investeerden under meyr in World Onnline. Do as dat bedryv in 2000 når de böärse güng, deade Wessels syne andeylen van de hande. Dat leyverden em hunderden miljonen euro's up. Vanuut datselvde Reggeborgh wör glasveselbedryv Reggefiber uperichted.

Wessels kochten in 2003 selv VolkerWessels weader terügge van eygene centen en haalden et van de böärse. In 2017 güng et bedryv weader når de böärse, wat weader eyns souvöäle geld upleyverden as wat et ekost had in 2003. Wessels syn vermöygen wör up sou'n 4 miljard euro eskatted, wårmed hee volgens de Quote 500 de darde-rykste man van Neaderland was.[5][6]

FC Twente bewark

Wessels stöäk vöäle geld in de enskedeeske vootbalklub FC Twente. Syn bröder Herman, meddirektöör by Volker Wessels, was noch van 1999 töt 2004 vöärsitter van de klub. In disse tyd sköälden de Wessels-bröders geldskulden kwyt wat se de klub tosköäven hadden üm spöllers te koupen.

Do as FC Twente in 2016 in geldnoud sat, trummeden Wessels nen koppel twentske underneamers up üm de klub geld te leynen, sou dat FC Twente neet failliet güng. Dårnå bleav hee sik töt synen doud nauw bemoien med et bestüür en de dagelikse afhandeling van saken.

Luchthaven Twente bewark

In de olde luchtmachtbasis van Twente tüsken Hengelo en Enskede saggen Wessels nen investeringskans. Hee wolde der internationale lynvluchten up låten vlegen, wat in de streake vöäle geld en wark solde upleyveren. Dat plan wör teagenewarked döär de vluchthavens van Münster/Ossenbrügge en Dortmund. Dat stöäk em. [7]

Persoonlik bewark

Wessels had töt synen doud nen nauwen emotionelen band med syn persoonlik assistente Sinie Wijnen. Hee hevt twey dochters uut en hüwelik wårvan hee vervrömd was. Hee stünd bekend as spykerhard sakenman, mär ouk as stillen geldsketer vöär sociale initiativen. Syne dochters hebbet syn vermöygen oaverenöämen en ståt nu edeyld dardes in de Quote 500.

Doud bewark

Dik Wessels küm in november 2017 uut de tyd do as he 71 jår was. Hee was en pår dage dårvöär upenöämen in et sekenhuus, med hartklachten.[8] Hee had et al es eyrder an et harte had en by ne operaty 5 ümleidingen kreagen. Toch bleav hee töt synen doud rouken. Hee wör under groute belangstelling begraeven up den gemeyndeliken karkhov et Lentfert in Ryssen.

Underskeidingen bewark

In 1999 wör Dik Wessels ansteld as Officier in de Orde van Oranje-Nassau. van de gemeynde Ryssen-Holten was hee eyrebörger.

Uutgånde verwysingen bewark

  1. Dik Wessels in Bouwgigant
  2. Herman en Dik Wessels in twentevisie (2001)
  3. (en) bloomberg.com oaver Dik Wessels by VolkerWessels
  4. websteade van de Reggeborgh Groep
  5. Dit zijn de 5 rijkste families van Nederland, volgens de Quote 500, BusinessInsider, 2 november 2017.
  6. De op twee na rijkste man van Nederland is overleden – Hoe Dik Wessels miljardair werd in de bouw, BusinessInsider, 21 november 2017.
  7. RTV Oost - Wie was Dik Wessels. 21. november 2017.
  8. Dik Wessels (71) overleden, Tubantia, 21 november 2017.