Eminem
Marshall Bruce Mathers III (geboaren up den 17. oktober 1972), vöäral bekend under synen artistenname Eminem (vake skreaven as EMINƎM), is nen amerikaansken rapper, leedkesskryver un platenmaker. Hee wördt beskouwd as eyne van de beste rappers van de wearld. Syn sukses as blanken rapper wördt seen as nen vöärnamen trad in et oaverwinnen van rassengrensen in de musik. Med syne musik wör hee en figuur med vöär- en teagenstanders achterin de jåren '90 van de 20. un de '00 van de 21. eywe. Hee is ne afspegeling van de underste sociale lågen van de Vereynigde Ståten. Vöäle nye artisten nömet em en vöärbeald. Syn hougst eplaatsde nummers sint under meyr "The Real Slim Shady", "Without Me", "Lose Yourself", "Not Afraid", "Love the Way You Lie", "The Monster", "Godzilla", un "Houdini".
Nå uutkummen van syn debuutalbum Infinite (1996) un de uutgebreide uutgave Slim Shady EP (1997), teykenden Eminem en kontrakt by Dr. Dre syn Aftermath Entertainment un wör rap vöär en grout publik bekend med The Slim Shady LP (1999). Syne beide volgende uutgaven, The Marshall Mathers LP (2000) un The Eminem Show (2002) slöägen wearldwyd an. Hee wör nomineerd vöär nen Grammy vöär Album van et Jår. Et wör et bestverkochte album van de wearld van dat jår. Nå uutkummen van syn volgende album Encore (2004) güng he der en tydken tüskenhen, vöäral ümdat he medicynverslaavd was. Hee küm weader med de uutgaves van Relapse (2009) un Recovery (2010). Den lätsten was ouk weader et bestverkoupende album van de wearld van dat jår. Dårnå küm he med syne albums The Marshall Mathers LP 2 (2013), Revival (2017), Kamikaze (2018), Music to Be Murdered By (2020), un The Death of Slim Shady (Coup de Grâce) (2024), wat allemål nummer 1-noteringen in albumhitlysten upleyverden.
Eminem was ouk by de hiphopgrupen New Jacks, Soul Intent, Outsidaz, un D12. Hee hevt samenewarked m edRoyce da 5'9" den as ouk uut Detroit kümt, under de name duo Bad Meets Evil. Eminem spöälden de höyvdrulle in 8 Mile, nen dramatiseerden film oaver syn leaven wat in 2002 uutküm. Et titelnummer 'Lose Yourself' stünd 12 weaken lange boavenan in de Billboard Hot 100. Et meyste wat nen solorapnummer ooit elükked is. Hee kreag der de Academy Award vöär Besten Originälen Song vöär. Dat was ginnen hiphopartist ooit elükked. Hee richteden Shady Records up, wårby as he andere artisten up gang hülp in öäre loupbane, sou as D12, 50 Cent un Obie Trice. Ouk richteden hee syn eygen Sirius XM radiostation up: Shade 45.
Eminem höyrt by de best-verkoupende musikartisten aller tyden, med nå skatting 220 verkochte albums oaver de heyle wearld. De heyle eyrste 10 jår van de 21. eywe verkochteden der nüms sou good as hee. Ouk tüsken 2010 un 2020 was hee den darden. As eyrsten artist lükkeden et em üm teen achtereynvolgende albums medeyne by uutgave up nummer 1 van de Billboard 200 to låten kummen. hee hevt vyv #1-singels up de Billboard Hot 100 had. The Marshall Mathers LP, The Eminem Show, Curtain Call: The Hits (2005), "Lose Yourself", "Love the Way You Lie", and "Not Afraid" hebbet allemål de anteykening Diamant van de Recording Industry Association of America (RIAA).
Hee hevt ne prysenkaste vul awards, sou as 15 Grammy Awards, 8 American Music Awards, 17 Billboard Music Awards, nen Primetime Emmy Award, un en MTV Europe Music Global Icon Award. Volgens Billboard was hee "Artist of the Decade (2000–2009)", un Rolling Stone nöömden em eyne van de "100 grötste artisten aller tyden" un "100 beste leedskryvers van alle tyden". In 2022 wör hee upenöämen in de Rock and Roll Hall of Fame.