Evert Baptist
Evert Baptist is n komische type van de Grunneger radiopresintoater Wim Drent (Knoal, 1969), eerst te beluustern op Simone FM en vanôf febrewoari 2008 bie Radio Continu, baaidend stasjons veur Noordoost Nederlaand. Op dit lèste stesjon kin man Evert Baptist heuren ien t programma Drent Draait Door.
Evert Baptist komt oet t Westerwôldse Vraiskelo en is traauwd mit Greta. Zien noabers haiten Kloas en Gemkje. Hai is nait hailmoal wies en schoamt zok naarngs veur. Hai belt voak noar bedrieven of mìnzen woar of er n advertinsie van in kraant zain het en komt mit vrumde vroagen en veurstèllen.
Baptist proat veuraal Grunnegs, sumtieds Nederlaands mit n swoar aksìnt. Hai verkondegt voak mit noadrok dat er oet Vraiskelo komt. Hai staait veuraal bekend om zien stopzinnen "Goeiedag eem" en "Zeg moar", wat tegenswoordeg in hail Oost-Grunnen en Oost-Drìnte overnomen wordt.