F.D.H. Postel

Frederik Derk Herman Postel (Laorne, 1 november 1828 - ok daor, 27 april 1899) was een Achterhookse schoelmeister en schriever.

Postel zien olders waren Carel Iwan Postel en Janna Schoneveld. Van 1856 töt 1899 was e schoelheufd in zien geboorteplaatse, de opvolger van zien va. Hij trouwde mit Hendrika Johanna Gerharda Wansink. Veur een dörpsschoelmeister was Postel slim geletterd; veule ankomende leraars gungen bij hum in de lere.

Postel was arg veurstaander van dierenbescharming, wat onder aandere bleek uut zien streven um in Laorne bij 't slachten van vee 't schietmasker inevoerd te kriegen. Zölf was e meermaols anwezig um op 't gebruuk dervan te letten. Det e drok was op dieren zaaj ok in zien wark; zo schreef e veur de Geldersche Volksalmanak van 1865 't verhaal 'Paerdelaeven', waorin e 't opnemp veur een old peerd. Wieder publiceerde hij in de Deventer Almanak.

Postel zien wark wördden bij mekare zet in 't onder schrieversname uutegeven Negen leppels kruudmôos, obbeschept deur F. D. H. Postmeter (Dèventer, 1885). Dit waren bename grappige stokken op riem en in proza. In 1928 kwaamp hiervan de darde drok uut.

Citaot

't Geld - dat eemes in de tesse
Net zoo vaste zitten mot
As de grùtste kemmeltande -
Smit men now veur allerhande
Onbog - net of 't niks is - vot.

Zunigheid uut de oolde tieden
Is, bin 'k stom, neet mear bekend;
Men telt now, zeedar! en kwatjen
Nog zoo vùlle neet, waratjen!
As destieds en halven cent.

Alles mot maor vulle kosten!
Al wat duur maor is en fien,
Daor mot 't geld an vot met heupe.
- Al is 't maor veur mooie kneupe,
En al mot men honger lien.

Uut 't gedicht 'Walear en Now', in Negen leppels kruudmôos

Bronnen

Berkel, Heleen van (ps. van H.L. Schrader-Rutgers), Bewoners van de Woolbeek in de tweede helft der achttiende eeuw (Lochem, 1950)
Heuvel, H.W., 'Meester Postel', in Nagelaten werk (Eanske, 1973)
Krosenbrink, Henk (veurwoord), Wie schrif, die blif. Veertien Oostgelderse schrievers (Oostgelderse Musea / Staring Instituut Doetinchem, Deutekem, 1981)

Dit artikel is eschreven in 't Zuudwest-Drèents.