Fries Wolma

Fries Wolma (Stad, 19 febrewari 1948) is een singer-songwriter, gitarist en meziekproducent uut de Nederlaandse pervincie Grunning. Zien nummers schrif e in 't Engels, Grunnings en Nederlaands. In zien teksten mag e de luusteraor geern mit weerum nemen naor de jaoren zestig en zeuventig. Wolma woont in Schouwerziel op 't Hogelaand.

The Javelins

Wolma krig al vrog een gitaar van zien volk; in 1962 giet e mit veertien jaor as sologitarist bij de Grunninger beatband The Javelins. Ze wisselt in 1969 van bezetting en wiezigt de name in Ash Tray. In 1977 koomt de oorspronkelijke leden van The Javelins bij menare en maakt een herstart. In 2007 hebt ze heur viefenveertigjaorig jubileum mit een reünieconcert, een boek en een single. As in 2008 zanger Jan Suiveer uut de tied kump, scheidt ze der definitief mit uut.

Wieder wark

In 2010 begunt Wolma mit Sijtse Scheeringa 't duo Zuver Scheerwol. Ok mit aandere muzikaanten stiet e geriegeld op 't podium en in de studio. As studiomuzikaant hef e mit artiesten as Denny Cristiaan, Ronny Tober en Henk Wijngaard espeuld. Bands daor as e in espeuld hef, bint onder meer Dandy, Reno & Frisby, Sundown, Zoo, Kangeroo, Invitation en de gelegenheidsformatie Pijppanic. Wieder treedt e op as solo-artiest. Zien eerste Grunningstalige nummer, 'Noar de iesboan', kump e in 1999 mit onder de name Jan Scheuvel.

Productie en schrieverije veur aandern

Veur verscheiden Grunninger artiesten hef Wolma cd's eproduceerd en arrangeerd, zoas Ik goa mien aigen weg van Johan Raspe, Swingend deur de nacht van Sijtse Scheeringa en Bébieboom van The Askay Brothers. Veur de bekende Grunninger zangeres Wia Buze schreef e 't lied 'Aal wat ik die wil zeggen'.

Platen

Cd's

• Kinder van de zun (2022)

Singles

• On the wing (1999, onder de name Seirf Amlow)
• Cooldown (Amlow records, 2006)
• Beatpiroaten (Amlow Records, 2011)
• Kerstnachtblues (201?)
• Zummertied (2015)
• Noakend in de regen (2016)
• Wie waren jong (Amlow Records, 2017)
• n Joar is zo veurbie (Amlow Records, 2017)
• Dodelijk verliefd (2017, mit Marianne Veenstra)
• Pure laifde is nait te koop (Amlow Records, 2018)
• Wie zingen 't zulfde laid (Amlow Records, 2019)
• Mis mien Schier (Amlow Records, 2020)
• Aarm of riek (Amlow Records, 2020)
• Poedie, poedie, poedie (2020, mit De Poedies)
• Zunne komt weer op (2021)

Bronnen

• Poparchief Groningen aover Fries Wolma
• Streektaalzang.nl aover Fries Wolma
• Streektaalzang.nl aover The Javelins

Dit stok is eschreven in 't Zuudwest-Drèents.