Google Maps
Google Maps is nen online kaartendeenst vuur op den komputer. Den deenst is van Google Inc.. Et böd satellietbeelden, stroatkaarten, 360° panoramabeelden (Google Streetview), de leste verkeersinformasie (Google Traffic) en routeplanners vuur vootgängers, autoveurders, fietsers (mut nog etest worden) en et openboar vervoor.
Google Maps vung an as een C++ komputerprogramma. Et wör oontwörpen duur Lars en Jens Eilstrup Rasmussen, van Where 2 Technologies. In oktober 2004 wör det bedrief oawerkocht duur Google, dee as der ne web-app van maakten. Google kochten der ook nog een bedrief bie wat vanoet de ruumte beelden van de earde maakten en een bedrief wat et verkeer verdan in de gaten heuld. Det deden ze allemoal bie mekoar en neumden et Google Maps, woermet as ze in februwoari 2005 de moarkt op gungen. De vuurkaante van den deenst gebrok JavaScript, XML en Ajax. Google Maps hef ne API woermet as kaarten ook op aandere websteas inbed worden köant. Doarbie köant bedriewen en organisasies in laanden oawer de hele wearld öare stea op de kaarte markeren. Met Google Map Maker köant leu zelf de kaarten verbetteren.
Met Google Maps' satellietblik kiekt gebroekers van böawenten op de wearld. De meeste beelden van steaden hebt hoge resolusie. Ze zeent nömmen vanoet een vleegtuug wat tusken 240 en 460 meter hoge vlög. De rest van de beelden keump van satellieten. De meeste satellietfoto's zeent neet mear as dree joar oold en wordt regelmoatig bie ewoarket. Google Maps gebrok ne benöadering van de Mercator-wiergawe, woerduur as de strekken um de wearldpolen neet precies eteund worden köant.
In 2013 wör der een niej ontwoarp van de komputer-app vrie egewen, nöast de "klassieke" versie van vuur 2013. In 2008 wör Google Maps vuur mobiel vrie egewen. Doarmet köant leu navigeren via GPS. In 2013 bleek at et den meest populearen app vuur smartphones was. Mear as 54% van alle leu oawer de hele wearld dee as een smartphone harren, hebt den app tenminsten eenmoal gebroekt.[1]
Volgens Google har et bedrief in 2012 mear as 7100 leu in deenst um de wearld in kaarte te brengen.