Hanzekantoor

Een hanzekantoor (van 't Fraanse comptoir, handelspost) was een butenlaanse handelsvestiging van de Hanze, een militair bondgenootschop van gildes die in de late middelieuwen en de vrogmoderne tied (tussen de dartiende en zeubentiende ieuw) een handelsmonopolie vestigden en in de bienen hölden in de Oostzee, een diel van de Noordzee en 't miest van Noord-Europa.

't Hanzepakhuus in King's Lynn is 't ienige oaverebleben gebouw van de Hanze in Engelaand.

't Begrip hanzekantoor gebruukten ze veur 't eerst in de zestiende ieuw. Veur die tied harren ze 't oaver huus of hof.

De Hanze har vier hanzekantoren: de Staolhof in Londen, 't hanzekantoor in Brogge, Bryggen in Bargen en 't Peterhof in Novgorod. Daornaost har de Hanze in partie havens een verteengwoordigende koopman en een pakhuus of factori'je.

De hanzekantoren waren belangrieke enclaves. De Staolhof (uut 1320) beveurbield gruiden uut töt een gemienschop mit een mure d'r umhenne en mit zien eing pakhuzen, weeghuus, karke, kantoren en woonhuzen. Van 't begun of an harren de hanzekantoren heur eing rechtspraoke. Zo keuzen de koopluden zo-enuumde oldermannen (ok comes hansae), die as 't toezicht oaver heur hölden. Later regelden benaom de leidende Hanzestad Lübeck de statuten van de hanzekantoren.

Van alle hanzekantoren stiet d'r vandage allennig nog Bryggen in de Noorse stad Bargen. Bryggen werd as hanzekantoor esleuten in 1754 en stiet now op de Wereldarfgoedlieste van de UNESCO. Wieder is d'r nog 't Hanzepakhuus in de havenplaatse King's Lynn, Engelaand, daoras ze in 1971 mederne kantoren in hebt emeuken. De Novgoroder Schra is de ienige hielemaol bewaorde verzameling bepaolings oaver de interne reglementen van de vier hanzekantoren.

In 't Duuts wördden 't woord hanzekantoor - in stee van 't mederne Büro - in de neengtiende en twintigste ieuw nog slim vake gebruukt veur koopluden d'r kantoren. Ok vandage an de dag gebruukt treditionele bedrieben 't nog. Vake vie-j dizze bedrieben in olde Hanzesteden.

Briede kiek op Bryggen

Uutgaonde verwiezing

Commons: Hanzekantoor - plaatjes, filmkes en/of gelüüdsbestanden.

Dit artikel is skreaven in et drentske dialekt van de Drèents-Oaveriesselse grèensstreek.