Hendrik Mulert

Hendrik Mulert (Zwolle, 15e ieuw - Stralsund, 18 augustus 1521) was een rechtsgeleerde en perfester uut 't Aoversticht. Hij diende as rector van de Universiteit Griepswohld in de Pommerse Hanzestad Griepswohld en was betrökken bij de hervörming van 't rechtsstelsel in 't Hartogdom Pommern.

Levensloop

Hendrik Mulert was der iene uut 't veuranstaonde Sallaandse geslacht Mulert. Hij gunk naor universiteiten in de Lege Laanden, Fraankriek en Rostock. In Rostock kwaamp e in de kunde mit de humanist en dichter Ulrich von Hutten. Hartog Bogislaw X van Pommern haalde hum as vörstelijk raodsheer naor Stettin. Krek as Petrus van Ravenna was Mulert ien van de geleerden die van wied vurt deur Bogislaw anetrökken wördden um 't recht en bestuur van Pommern op de schuppe te nemen.

In 1513 stelde de hartog hum an de juridische faculteit van de Universiteit Griepswohld an. 't Kan wezen det Mulert een stemme had in de anstelling an de keunstfaculteit van Johan Luwens uut Asselt, de dichter Johannes Hadeke en de perfesters en politici Peter en Georg Gruel. In 1514, 1416 en 1520 was Mulert rector van de universiteit. Studenten die onder hum heur doctoraat behaalden waren onder aandere de rechtsgeleerden Johannes Otto, Johan Oldendorp en Hinrik Bukow. Dizze lu kregen later zölf anstellings an de universiteit.

In 1518 trouwde Mulert mit de weduwe van Joachim Stevelin. Tiedens een verblief in Stralsund kwaamp e in 1521 uut de tied.

Dit artikel is eschreven in 't Zuudwest-Drèents.