Jeremy Paxman

Jeremy Dickson Paxman (Leeds, 11 meie 1950) is een Engelse tillevisieprissentator, journalist en schriever. Hij gruide op in Hampshire en Worcestershire en studeerde Engels in Cambridge. In 1972 kwaamp e bij de BBC, eerst veur de plaatselijke radio in Brighton. Vanuut Belfast deu-r-e een steugien verslag van de Noord-Ierse Troubles. In 1977 verhuusde Paxman naor Londen. Daor gunk e veur verscheiden neispergramma's an de slag: Tonight, Panorama, BBC News at Six en Breakfast Time. Van 1989 töt 2014 prissenteerde hij 't bekende neismagazine Newsnight.

Sinds 1994 is Paxman 't gezichte van quizpergramma University Challenge, daor as loeke studenten an mit doet. Ok prissenteerde hij de vierdielige documentaire The Victorians (2009) en de viefdielige serie Empire (2012), een kritische kiek op 't Britse Riek.

Paxman raakte bekend en berucht deur zien vraoggesprekken, veural die mit politici, waorin e mit confronterende, mangsmaol aordig bretaole vraogen de geïnterviewde veur 't blok zette. Een opmarkelijk vraoggesprek wördden det mit de Conservatieve politicus Michael Howard in 1997, an wie e een dozien maol achter mekare dezölfde vraoge stelde ("Did you threaten to overrule him?"), toen as Howard almar 't antwoord uut de wege gunk.

Paxman woont in Londen en hef drei volwassen kiender. Hij is fan van Leeds United en is drok op vliegvissen. Zien breur Giles hef Brits ambassadeur van Mexico en Spanje ewest; zien zuster Jenny is pergrammamaakster bij BBC Radio.

Schrieverije

A Higher Form of Killing: The Secret Story of Chemical and Biological Warfare (1982, mit Robert Harris)
Through the Volcanoes: A Central American Journey (1985)
Friends in High Places: Who Runs Britain? (1991)
Fish, Fishing, and the Meaning of Life (1996)
The English: A Portrait of a People (1999)
The Political Animal: An Anatomy (2003)
On Royalty (2006)
The Victorians: Britain Through the Paintings of the Age (2009)
Empire: What Ruling the World Did to the British (2011)
Great Britain's Great War (2013)
Black Gold: The History of How Coal Made Britain (2021)

Dit artikel is eschreven in 't Zuudwest-Drèents.