Klaas Bernink

kunstskilder uut Twente

Klaas Bernink (29. oktober 1913 in Glanebrugge - 1. määrt 1996 in Eanske) was nen kunstskilder uut Twente. Hee is vöäral bekend döär syne strakke skilderyen van burenehüse, landskoppen, fabrykshallen un industry, dee vöäle lüde van em kochteden. Et meyste van syn wark is bewård in de Kunstcollectie Haaksbergen un de gemeynde Eanske.

Leavensloup bewark

Bernink syn vader un moder kummet by Gramsbargen in Salland weg. Dee sint up Eanske anekümmen as der noch vöäle wark in de textyl is. Nå de laegere skole un twey jår as loupjungen müt Bernink med 14 jår et fabryk in üm to warken. Dår blivt hee sou'n vyventwentig jår un kümt torechte by Ramie Union up de starkerye; hee müt de spünnene dröäde styver maken in en lymbad, soudat se starker wordet vöär et weaven.

Et wark is em gin pyptabak waerd un hee kan der syn ei neet in kwyt. Vöäle tyd spendeert hee in de bibliotheek, by et musik un med syn teykengerei. Eynen dag höyrt hee at de nye AKI, de akademy vöär beyldende künste, ouk ne åvendstudy anbüdt. Hee weat neet wo rap as hee sik inskryven müt. Nöäst vakinholdelike lessen krigt hee ouk kultuurhistoriske insichten med van Aldo van Eyck un Joop Hardy. Der geyt em ne wearld lös.

In 1954 krigt hee de uutnöydiging üm by de Twentske Künstkring to kummen un syn wark uut to stallen in Rijksmuseum Twenthe. Et duurt neet lange of hee eksposeert vakerder. In de jåren '60 is hee styv druk med nen koppel kunsteners dee moderne un abstrakte kunst maket. Hee haalt syne ideen vöäral van fabryksterreinen. As starkerman kent hee al best wat, mär in 1963 trekt hee döär et düütske Roorgebeed. Dår süt hee noch vöäle meyr. Hee maket syne lynen un vlakken strakker un kümt sou up en abstrakt-geometriske förmenspel. Dat kümt em later noch good van pas in syne wandskilderingen in allerhande skoolgebouwen in Eanske. Mär heylemål abstrakt, dat is em ouk neet allens.

As hee 's morgens når et wark hen fytset (hee warket noch altyd in et fabryk), süt hee kleine sköpkes un sküürkes in de weides langs den rand van de stad. Hee begint se to skilderen, up kleine vlakken, med polymeer of akrylvarve. Strakke vlakken med swarte lynen in bysündere klören.

In 1965 kan hee der van leaven. Hee krigt ne steade in de Beeldend Kunstenaars Regeling. "Nen voagel den as uut de kawe lösekümmen is," nöömt hee et selv. De lüde magget syne skilderyen van karaktervulle, mangs up de slouplyste stånde geavels van stadshüse, gaerne lyden. De lüde seet der et pleserige van'n alledag in. Hee gevt nen vöärset vöär wat later stadsbehold un gemeyndelik monumentenbeleid geyt heaten.

Reisen mag Bernink ouk gaerne doon, un et geyt em sou good dat dat ouk vaker kan. Güng hee in 1958 vöär et eyrste når Parys un teen jår later med synen söäne up ne rundrit döär de Alpen un langs de Middellandse Sey, in de jåren '70 is hee regelmåtig up de Balkan. Et gewoane leaven van de buren dår teagenoaver et kommunisme spreaket em an.

In de tachtiger jåren skildert hee voordan vaker buurderyen. Neet blouts dee in Twente, mär uut heyl Europa. Et strakke uut syne abstrakt-geometriske tyd is der neet meyr by. Lynen magget van em wal bügen.

Styl un tema's bewark

Bernink warket en grout deyl van syn formende jåren tüsken fabryksmüren. Dat küm in de begintyd un et ende van syn skildersloupbane weaderümme. In et begin is hee der slim untovreyden med un sint syne skilderyen strak un grau. Under invlood van den ümmegang med andere moderne kunstenaars wördt syn wark abstrakter un strakker. Vlakken hebbet mär eynen klöör un fabriken hebben gin eynen runden form. Syne buurderyen un landskappen hebbet gin skaden un vake ouk gin sünne. De lucht is wit un grau. böyme sint meysttyds kaal un grillig.

As hee wat ölder wördt sint de skilderyen van heyrenhüse un buurderyen wat milder un leefliker. Bernink löt der wat meyr natüürlike förme in to, al sint dee noch altyd slim stileerd. Döärgåns ståt der gin lüde up syne skilderyen. Dee låtet sik genog gelden in de gebouwen.

Persöönlik bewark

Bernink trouwt in 1936 med Alie Trinks. Uut et huwelik wordet twey kinder geboaren: Joke (1941) un Henk (1946). By de köäring vöär militären deenst wördt Bernink afeköärd; hee solde klörenblind weasen. In syne skilderyen is dår weinig van to seen. Ouk dochter Joke geyt uutendelik skilderen. See hevt en eygen warksteade in Eanske. Söäne Johan kan der ouk med, mär düt et der by nöäst.

Brunnen bewark