Kettenzage

n Kettenzage, veur de grap oek vake knetterbiele eneumd, is n draagbaor ding waor je mee zagen kunnen. n Kettenzage gebruuk je meestentieds veur t zagen van bomen of aander houtspul.

n Keerl mit n kettenzage van t mark Stihl

Gebruuk

Je kunnen de kettenzage gebruken bie t oprumen van ummevöllen of zieke bomen of bie t snoeien van takken, umdat t veuls te veul wark is um t mit de haand te doon. Vrogger gebruukten ze in plaotse van n kettenzage n gewone biele of n haandzage. n Aander stuk gereedschap wat ze vrogger oek wel gebruukten is de spanzage of de trekzage.

Naost de kettenzage veur t zagen van hout, he'j oek alderhaande kettenzagen veur t zagen van aander spul, bieveurbeeld veur natuursteen, keien of beton.

Ho t warkt

Je hebben twee soorten kettenzagen, de ene wördt an-edreven deur n motor (mit benzine) en de aandere löp op elektrisiteit. De kettenzage die op elektrisiteit löp is veural veur partikulier gebruuk.

De kettenzage besteet uut dree onderdelen, de motor, t zaagblad mit daoran n soort fietsketten, mer dan mit scharpe mesjes. De mesjes zörgen derveur da'j goed zagen kunnen. De ketten mut goed onderhöllen wörden, dit ku'j doon deur der olie op te smeren en de ketten eens in de zoveul tied goed scharp te laoten maken.

Veiligheid

A'j n kettenzage gebruken mu'j de oren goed bescharmen, went a'j der vake mee warken, ku'j doof of slichtheurend wörden van al die harrie. Veur de rest van t lief ku'j bescharmend grei antrekken en veur de ogen mu'j n bescharmingsbrille opzetten.

Kampioenschappen

Der bin tegenswoordig oek internasionale kampioenschappen houtzagen mit kettenzagen. t Geet der dan umme wee t vlotst dree lieke plakken van n stobbe kan aofzagen. De tied wördt emeten vanaof t moment dat de zager de zage anslingert totdat e m weer uutdut.

Uutgaonde verwiezing

Commons: kettenzagen - plaatjes, filmkes en/of gelüüdsbestanden.

Dit artikel is eskreaven in et westveluwske dialekt van Nunspeet, in de Algemene Nedersaksiese Schriefwieze.