Knoet II van Denemaarken
Knoet den Groten of Knoet den Machtigen (995 - 12 november 1035) was keunink van Denemaarken van 1018 töt 1035 en keunink van Engelaand van 1016 töt 1035. In et Engels het he Cnut I of Canute the Great. Hee was ook nog keunink van Noorweagen van 1028 töt 1035.
Keunink Knoet wör "Lambart" deupt, mer neumden zikzelf Knoet. Zinne bienaams "den Groten" of "den Machtigen" kreeg he umdet et um lukten um Noorweagen en delen van Zweden bie zin riek te kriegen.
Noa at zin vaar Svein Vorkboard oet de tied köm in 1014, wör hee keunink van Engelaand, terwiel as zin breur Harald Sveinsson keunink van Denemaarken wör. Keunink Svein har weeld at de breurs beaide een riek zollen oarven. Toen as breur Harald veer joar noa Svein oet de tied köm, oarven Knoet der Denemoarken ook bie. Hee mos verskillende moalen vechten in Engelaand toen as den vurigen keunink doar, Ethelred den Roadlozen, wierköm noa Sveins dood. Met hulpe van den eulderen Olav II van Noorweagen (Olav den Healigen) wör Knoet keunink van Engelaand in 1016. In 1017 trouwden hee klook met Ethelreds weddevrouwe, Emma van Normandië, ne dochter van den normandiesen hartog Robert I. Knoets zuster, Estrid Sveinsdatter trouwden met den hartogs breur, Richard.
Olav den Healigen, den zien zwoager Anund Jacob van Zweden en den zweedsen jarl Ulf Torgilsson maakten een verboond tegen Knoet. In 1026 versleug öar Knoet bie den Slag bie Helgeå in Skåne. In datzelfde joar leut he Ulf vermoorden in de Dom van Roskilde. In 1028 treuk Knoet met 1400 skepe noar Noorweagen. De Noren sleuten zik bie um an en dwungen Olav den Healigen um te vluchten. Hee steelden eerst zin zusters zönne Håkon Eiriksson Ladejarl an as keunink. Den verdreunk, woernoa as Knoet zin egene zönne, Svein Knutsson, keunink maakten.
Knoet was doo nen machtigen keunink. Hee bezöchten Rome um bie den kronink te wean van den Duuts-Romeinsen keaizer Konrad II. Doar wör hee huldigd as den tweedemachtigsten Kristeliken vorst. Knoet zaggen zikzelf mear as keunink van Engelaand as van de aandere stoaten. Hee was ook mer weainig in de aandere laanden. Hee köm in 1035 oet de tied en lig begreawen in de Dom van Winchester.
|
Dit artikel is eskreaven in et twentsk. |