Konrad Klapheck

Konrad Klapheck (Dusseldörp, 10 febrewaori 1935 - ok daor, 30 juli 2023) was een Duutse schilder en grafisch kuunstenaor, wie zien schilderstijl elementen van 't surrealisme en pop art bij menare brengt.

Konrad Klapheck ofebield deur Lothar Wolleh

Hij studeerde van 1954-56 schilderkuunst onder Bruno Goller bij de Kunstakademie Düsseldorf. Klapheck zien warken van midden jaoren vieftig bint in een magisch realistische stijl, die meer idiosyncratisch wördden toen hij de eerste van een riege typmesienes schilderde. 't Wark det volgde, vake doeken op grote schale, bint krekte en schienbaar realistische uutbieldingen van technische apparatuur, mesienerie en dagense veurwarpen. Dizze objecten wördt op een bevrömdende meniere eprissenteerd; ze bint "monumentaal, vermakelijk absurd en seksueel suggestief".

De onderwarpen die in de loop van de jaoren in Klapheck zien wark veurekomen bint, bint op volgörder van opvoering: typmesienes, neimesienes, kranen en douches, tillefoons, striekiezers, schoenen, sleutels, zagen, autobaanden, fietsbellen en klokken. De "ironische ofbielding van alledaagse mechaniek", onder invloed van Marcel Duchamp, Man Ray en Max Ernst, löp op de pop art veuruut in de uutvergroting van 't triviale. Klapheck hef ok affiniteit mit 't Fraanse surrealisme. André Breton schreef zien leste epubliceerde tekst aover een tentoonstelling van Klapheck bij Galerie Sonnabend in 1965.

Tussen 1992 en 2002 hef Klapheck kammeraoden, collega's en beroemdheden uut de internationale kuunstwereld eschilderd. In 1979 wördden hij leraar an de Kunstakademie Düsseldorf.

Uutgaonde verwiezingen

• Konrad Klapheck in de Artcyclopedia

Dit stok is eschreven in 't Zuudwest-Drèents.