Louis Albert Roessingh

(döärstüürd vanaf "L.A. Roessingh")

Louis Albert Roessingh (Assen, 10 december 1873 - Antwarpen, 18 jannewaori 1951) was een Drèentse schilder en dichter.

L.A. Roessingh

Zien va, mr. Izaac Roessingh, was president bi'j de rechtbaanke. Louis kwaamp oppe Academie der Schone Kunsten ien Antwarpen, daoras e ien 1909 trouwden.

Vanof 1901 kwaamp e weer regelmaotig ien Drenthe. Hi'j schetsten en schilderden 't Drèentse laandschop en maakten ok pertretten. Hi'j had wal enig succes, mar um rond te komen mus e dielen van de huzen daoras e ien woonden verhuren. Ien 1908 leut hi'j ien 't plaatsien Elp, um-en-bi'j 15 kilometer ten zuden van Assen, een huus bouwen, "De Zandhof". Hi'j hef ofwisselnd ien Antwarpen en Elp ewoond, en was van 1917 töt 1923 gemienteraodslid ien Börk. Ien 1918 en 1919 was e lid van de Grunneger kunstenaorsveriening De Ploeg. Ien Amsterdam was e bi'j de kunstenaorsveriening St. Lucas.

Zien gedichten, die as e sund 1923 ien de Nieuwe Drentsche Volksalmanak leut ofdrokken, wördden ien 1948 bi'j-ien ebrocht ien de bundel 't Diggelhoes, de eerste dichtbundel ien 't Drèents.

De ien 2003 uutekeumen bloemlezing van de Drèentse schrieveri'je Scheupers van de taol (kiekt bi'j de Bronnen) is geïllustreerd mit waark van Roessingh, die deur de schrievers "de beste schilder onder de Drentse dichters" enuumd wördt.

Waark bewark

  • 't Diggelhoes (gedichten, 1948)
  • Stad der paleizen (herinnerings an zien Asser jeugd, 1951)
  • Stoefzaand, gedichten en tekeningen van L.A. Roessingh (1988, waark van 1939-1948)

Citaot bewark

Ja, krek ales weur hier offerd:
Brede wegen, heid' en heerd,
Strubben, wal en zaandverstoeving,
Ales weur verliekedeerd.

Daolkies wordt, mien golden iempies,
Hier het leste slaggien scheurd.
Veur deen sangen hoed, mien Drenthe,
Hebt deen kinder 't geld dan beurd.

Uut 'Veuroetgaank', in: L.A. Roessingh (1948), 't Diggelhoes, Assen: Van Gorcum & Comp. N.V.

Bronnen bewark

  • Rouke Broersma (red.) (2003), Scheupers van de taol: Bloemlezing van de Drèentse Schrieverij 1837-2003, Zuudwolde: Het Drentse Boek, blz. 41-42
  • Abel Darwinkel, Jan Germs en H. Slot (2005), Moi! Taalgids Drenthe, Assen: In Boekvorm Uitgevers bv, blz. 10-11
  Dit stok is eskreven in 't Zuudwest-Zuud-Drèents van de Drèents-Oaveriesselse grèensstreek.