Comomeer

Et Comomeer (Italiaans: Lago di Como, en mangs ook Lario neumd noar de Latiense name Larius Lacus; Lach de Comm in Lombardies) is een meer van smeulten gletsjeries in et Italiaanse Lombardië. Et is 146 kilometer in et veerkaant, woermet as et noa et Gardameer en et Lago Maggiore et grötste is. Met zowat 400 meter is et ene van de deepste meeren van Europa. Den meerboadem lig meer as 200 meter oonder de zeespegel. Varenna en Lierna wördt vake töt de mooiste dörpkes van et Comomeer rekkend.

Seend Romeinse tieden is et Comomeer al ne geleefde stea bie oadel en rieke leu. Der komt völle toeristen op of vanweage artistieke en kulturele zeensweardigheden. Et hef grote villas en paleizen zo as Villa Olmo, Villa Serbelloni en Villa Carlotta. Völle bekeande leu hebt een hoes an et meer, zo as Matthew Bellamy van den Britsen band Muse, Madonna, George Clooney,^[1] Gianni Versace, Ronaldinho, Sylvester Stallone, Julian Lennon, Richard Branson, Ben Spies, en Pierina Legnani. Et Comomeer wörd duur völle leu as ene van de meuiste meeren van Europa beskouwd.^[2]

Umgewing

Et meer hef ne oard Y-vörm. Den noordeliken tak begeent bie et städken Colico. De städkes Como en Lecco zit an et eande van de zuudwestelike en zuudoostelike täkke. De kleane städkes Bellagio, Menaggio en Lierna lignt op et knooppeunt van de täkke. Der geet nen bootdeenst in nen dreehook tusken de städkes hen en wierumme. Bie Lierna lig een wit straand en een kasteel.

Et Comomeer krig water van de Addarivier den as bie Colico binnenkeump en verdan vlöait bie Lecco. Dit betekent det den zuudwesteliken tak doodlöp, woerduur as Como regelmoatig oawerstreumt.

Et boargachtige vuuralpenlaand tusken de twee zuudelike täkke van et meer wörd Triangolo lariano (den Lariaansen Dreehook) eneumd. Hier onsteet de Lambrorivier.

Wear

Et wear roond et Comomeer is meestal meeld. Der hearst een Middellaanse Zeeklimaat, woerduur as der tropiese en subtropiese plaanten gröait. Den weenterdag heuld et meer de umgewing wöarmer. In januwoari wörd et der duur mekoar 2°C en in juli 30 °C. Et water wörd in juli duur mekoar 24 °C. Der vaalt mer heel mangs snee en dan vuural op de heugere boargtöppe. Den meesten reagen vaalt in mei en et minst in et weenter.

Toerisme

De meeste toeristen komt noar et Comomeer vuur et oetzicht, de weelde deers en de spa's.^[3] Watersporters komt der ok gearne, um te zealen weendsurfen en te kitesurfen.^[4] In 1818 skreef Percy Bysshe Shelley an Thomas Love Peacock: "Dit meer oawerstig allens wat ik ooit an mooiheid ezeen hebbe, behalve de arbutus-eilaanden van Killarney. Et is laank en smal en lik op nen machtigen rivier den't zik um de boargen en bossen kroonkelt.^[5]

Comomeer in popkultuur

In 1995 wör der nen film A Month by the Lake op enömmen op verskeaidene steas um et meer.
Wat scenes oet Star Wars Episode II: Attack of the Clones (efilmed in 2002) dee spöld wordt op de planeet Naboo, zeent opnömmen bie Villa del Balbionello.
In den film Ocean's Twelve woont den deef Francois Toulour in de Villa Erba, woer as he zin tegenspöller Daniel Ocean een antal moal tegenkeump.
Verskeaidene beelde van et Comomeer komt vuurbie in den James Bond-film Casino Royale oet 2006. Villa del Balbianello is et zekenhoes woer as James Bond anstoarkt. In de leste scene achtervolget Bond zinnen tegenspöller Mr. White in Villa La Gaeta.
Den videoclip vuur Gwen Stefani zin nommer Cool is efilmed in Villa Erba en op et strand van et Comomeer.
Den videoclip vuur John Legend zin nommer "All of me" wör opnömmen bie et meer.