Leonard Cohen

Canadese dichter, romanschriever en zanger-tekstschriever

Leonard Norman Cohen (Westmount, Canada, 21 september 1934 – Los Angeles, Verienigde Staoten, 7 november 2016) was een Canadese dichter, romanschriever en zanger-tekstschriever. Zien wark begef hum vake op 't sniedpunt van erotiek en religie.

Leonard Cohen in Venetië in 1988

Dichterije en romanschrieverijeBewarken

Cohen kwaamp uut een gegoed nöst van Engelstalige Jeuden in Montreal. As jongkerel had e succes mit wat vrogge dichtbundels, veurdet e mit een schrieversbeurs van de Canadese aoverheid naor Londen trök, en kört daorop naor 't Griekse eilaand Hydra, um an romans te warken. 't Miest van de jaoren zestig bracht e deur in 't boheemse internationale milieu van Hydra.

MeziekcarrièreBewarken

In 1967 lanceerde Cohen in de Verienigde Staoten een carrière as zanger-tekstschriever. Zien vrogge platen wolden best lopen; 't nummer 'Suzanne' van zien debuutplaat Songs of Leonard Cohen (1967) sleug slim an. Nao een dip in de jaoren zeuventig en tachtig, waorin e wal albums bleef uutbrengen, kreeg 't pebliek hum weer in de reken deur 't album I'm Your Man (1988). Waor hij humzölf in zien eerdere meziek op de akoestische gitaar begeleidde, kreeg zien wark now meer synthesizer-invloeden. Vrouwelijke achtergrondzaank bleef wal kenmarkend.

In de ienentwintigste ieuw, naodet hum zien manager besteulen had, mus Cohen vanneis op tournee um de kasse te spekken. Daordeur, en deur 't succes van zien lied 'Hallelujah' nao een cover deur Jeff Buckley, wördden een neie ginneratie drok op zien meziek. Een hiele riege internationale eerbewiezen en priezen völt hum ten diel.

PrivélevenBewarken

Cohen is nooit getrouwd ewest; uut zien relatie mit Suzanne Elrod wördden een jonge en een maagien geboren, Adam en Lorca. Cohen stund derumme bekend det e 't mit talloze vrouwlu anlegde, al had e meerdere langdurige relaties, zoas op Hydra mit Marianne Ihlen. Zien eigen liefdesleven was hieltied een thema in zien wark.

Cohen had anleg veur zwartkiekerije en zat in de jaoren negentig in een zenboeddhistisch klooster in Los Angeles um kalmte te zuken. Mit de zenleraar daor, Kyozan Joshu Sasaki ('Roshi'), was e kammeraoden.

  Dit artikel is eschreven in 't Zuudwest-Drèents.