Maria Aaltje (Marianne) Timmer (Sapmeer, 3 oktober 1974) is n veurmoaleg Nederlaandse scheuvelloopster mit as bienoam "Timmertje". Heur spesjaliteit was de 500, 1000 en aan t begun van heur loopboan ook de 1500 meter. Timmer is de ex-vraauw van heur veurmoalege trainer Peter Mueller en is nou traauwd mit old-Feyenoord-doelman Henk Timmer.

Marianne Timmer op t ies

Timmer brak deur ien tied van t Wereld Kampioenschop veur junioren woar of zai brons hil. Ien de joaren derop spesjalizeerde zai zok op de körte ôfstanden en schreef zai geschiednis deur as eerste Nederlaandse scheuvelloper op twij verschaaidene Olympische Winterspeulen n golden medalje te winnen. Op baaide Speulen beurde dat op 19 febrewoarie, de staarfdatem van heur beste vrundin Renske Vellinga tiedens de Olympische Winterspeulen 1994 in Lillehammer, Noorweeg. Noast heur scheuvelaktiviteiten het zai sunt 2006 soamen mit heur man en zien bruier n klaidenwinkel ien Haarderwiek. Op 21 jannewoarie 2008 mouk Timmer bekend heur kontrakt bie DSB verlengen te willen bit de Winterspeulen van 2010 ien Vancouver. Hierover was zie ien onderhaandelen mit DSB-direkteur Toon Gerbrands en is offisjeel bekrachtegd op 21 febrewoarie 2008. Ien maai 2010 besloten Timmer, Annette Gerritsen en Margot Boer vot te goan bie de ploug Control en n aigen ploug te begunnen. De sponser van dizze ploug wer de koekjesproduzent Liga, vandoar de noam van de ploug, Team Liga. Noadat Timmer op 28 dezember 2010 bekendmouk op te holden mit de scheuvelspôrt gaf zie aan wel bie dit team betrokken blieven te willen, omreden zai dijent is dij t inisjetief tou t begunnen van t team nomen het. Tiedens t Weerldkampioenschop scheuvellopen sprint 2011 ien Heerenveen nam Timmer op 22 jannewoarie 2011 offisjeel ôfschaaid. Doarbie wer zie benuimd tou erelid van de KNSB.