Military (oet esprökn as MILLEtriej) is n oonderdeel van de peardesport, geliek an cross-country (letterlik: dwars duur t laand). t Peard en ruuter jaagnt oawer n lös stuk veeld of laand woerin't 'natuurlike' heendernisse stoat, bv. bouwwoarkn met boomstämme, noa emaakte sleute en aandere waterbäkke. t Dool is um dr zo rap meugelik duur te komn.

Ruuter John Chapman spreenk met zin peard oawer ne heendernis bie de Military in Blenheim

t Peard mut doarvuur n best oethooldingsvermeugn hebn. t Härte mut de jachterigheid good an könn. Vuur dissen sport wordt meestal volbloodpearde broekt. Disse hebt n good oethooldingsvermeugn en zeent froai rap.

In t verleedn gebuurn t wal es det n peard strukeln, en det he ofmaakt mos wordn umdet he zo slim gewoond was. Doarumme wör de Military duur deerbeskoarmingsorganisasies fel zwart emaakt. Rechtevoort keump dit hoaste nit mear vuur. Det keump duurdet nen veeärts de deers eerst kuurt, vuurdet ze met magnt doon. Doarbie wordt dr vuur de heendernisse brekbeume broekt; spesjale balkns dee't vanzelf brekt as n peard dr te hard teegn an stot. In Bokel bie Eanske wörd al heel völle joarn de Military van Bokel eheuldn. Doaran deed in t verleedn zelfs Prins Charles van Groot-Brittanje met. Wieders he'j in België nog grote internasjonale Military's, in Lummen en Waregem. Vuur n Tweedn Wearldoorlog leup Neerlaand vuurop as t gung oawer Military-jaagn; de ruuters Charles Pahud de Mortanges, Dolf van der Voort van Zijp en Gerard de Kruijff wördn twee moal Olympies kampioen met de Neerlaandse ploog: 1924 en 1928.